IVF - day 11: 平安的心

嚟到day 11，再覆診。旦旦的數目又由4+1進了一小步，變了4+2。即係話，至少會抽到4粒，另外兩粒就要睇旦旦們的造化了

 

三粒大旦旦已經變到2.0-2.2mm，但Dr Tay話唔怕，真係抽到出嚟通常會細少少（因為照的時候只係照到某一個側面，加上要用力按住等佢清晰啲，所以有少少影響）。

另外前日長到1.3mm的，今日已經變了1.6mm。

原先只有0.9mm的小旦旦，長到接近1.4mm了！

仲有一粒兩日前都未開始長的，忽然間變大了，有1.1-1.2mm。不過會唔會變到夠1.8mm，變得夠成熟可以抽，則仲係未知之數。

 

照的時候距離抽卵的手術仲有40小時，希望佢地都乖乖長大。

 

已經打了夜針。今次有心理準備，冇覺得咁痛了

再次多謝各位畀我的正能量。有同路人，真好

 

嚟到今日，心裡好平安。感謝神！希望到星期三同樣可以平安的心面對！

IVF - day 9 : 上帝聽禱告

上帝聽禱告！

 

只係24小時，3日前還未入流的小旦，今日長到0.9mm！Dr Tay話，佢好有機會可以入圍；而另一粒3日前仲係中size的旦旦，一夜之間長大了0.3mm，今日變了大旦，有1.3mm了！另外三粒大旦旦好乖，噚日開始放慢了腳步，維持喺1.5-1.6mm的水平，慢慢長大。Dr Tay話，可以維持原判喺星期三至做egg extraction。而估計可以攞到有用的旦旦，由噚日的3-5粒，變成了4-5粒。

 

雖然只是一小步，但旦旦們確係一天一天在進步。我心存感恩！

 

還有四天時間，有兩天可以打針！希望0.9mm的小旦可以好似之前的中旦一樣，快高長大。至於其他小小旦會唔會有奇跡，我不知道，但一切交在天父身中，求祂給我最好最好的。

 

星期三0800的就做手術了，0700要到醫院check-in，仲早過返工！不過好彩星期二係public holiday，希望可以好好休息！

 

多謝各位好朋友的打氣和鼓勵，沒有你們，可能我已經被負能量淹埋了... 有了你們，我的路易走了很多很多。未來還有很長的路，但願你們一直陪著我走過人生的這一節，也願我的經歴日後成為其他人的祝福，就好像你們今天都在祝福著我一樣

IVF - day 8

由day 7開始，由一日打一針變成一日打三針。再皮大肉厚的肚皮，都開始出現不同大細和顏色的瘀痕...

今日返去再見醫生，終於有些少起色，多一粒小卵泡在爭氣的長起來。這一粒，還是在左邊卵巢。至於右邊卵巢，一直都只有一粒大的，其他有一堆小的圍住那個大卵泡，可惜還是不爭氣。目前，確定可以抽到的只係3個大卵泡，兩個中卵泡要是爭氣的話，還有機會趕上。至於其餘的，恐怕機會不大了。不過，由3-4個變成3-5個，我都覺得好開心。至少，他們都在進步。所以，我也要進步！

本來預計係星期三至抽卵的，但似乎我的大卵都長得好快，醫生擔心有機會變得太大，所以明天還要返去照多次。萬一大卵真係長得太快，咁就要提早到星期二抽卵。咁啲細卵可能就更加追唔切了。希望大卵們都停一停，等一等，讓細卵們有時間長大吧！

不過，上帝真係有預備。

過去幾年，為工作的緣故一直都很不開心。到近幾個月，有些事情的發生令我更加唔開心。負能量一直圍繞著我，甚至築起了一道很高的牆，把歡笑都隔開了。我也記不起多少個主日，都在崇拜中由頭喊到尾。我由去年底開始決定找工作，認真寫過幾封求職信，但都沒有回音。但就在我想不到的時間，有份很不錯的工作竟然主動找上門！今天終於有口頭offer! 那一刻，我真係覺得一天都光晒！

希望呢個好心情，幫助我的旦旦乖乖長大，讓我能更從容的迎接下星期的IVF。

願上帝的旨意行在我身上，如同行在天上。願我心尊主為大。阿門。

IVF - day 6

打咗四日針，反應都係麻麻地，只得三粒大、一粒中。仲有5粒好細，但似乎唔係好受藥。可能到下星期三抽卵，都係得3﹣4粒。

 

我要祈求神蹟。

記得幾個月前返教會聽有關人工科技的講座時，講員講到IVF的道德問題。用IVF解決不育不是問題；而係，多出來的胚胎日後點處置？因為在神眼中，這已是生命。當時我心裡有個微小的禱告，說：日後如果真係要做IVF，希望胚胎夠就好了，不要太多，我不想到時心裡作難，要處理多餘的胚胎... 可能真係一語成讖。但如果真係咁，胚胎唔多但夠用，這絕對是件好事。但少信的人總是多疑，擔心卵唔夠，抽出來又可能係空心，就算有卵都未必可以受精，受精之後又未必發育得好，放入身體後又未必可以順利著床，著了床也不等如可以順利成長至足月... 簡單說，少信將我擊倒了。

說實在的，再positive的我去到這一刻，心裡確實很擔心，尤其經濟上的壓力。做一次IVF還好，如果冇雪胎，每隔一個月要使成十萬蚊嚟重覆一次，真係頂唔順。我頭先臨走同Dr Tay講，如果真係搞成咁，睇怕要賣車至有錢做

Dr Tay還是十分positive，佢話只要個病人想博，就算得一粒佢都會同個病人博，因為結果只有God knows。佢話之前有個patient, 年紀比我細，IVF高我好多，到抽嘅時候都係得兩粒，仲要得一粒係空心。但用凈底唯一嘅一粒去博，畀佢博到個女。所以博同唔博，係病人嘅決定，只係病人想博，佢一定同佢博，因為唔博連凈係嘅chance都冇埋。

我明白，亦深知道喺咁嘅情況下，轉IUI都唔係一個option。因為我的情況, very likely係會愈嚟愈差、愈嚟愈少。今次我點都會撐落去。

所以，真係要祈求神蹟。

以往會安慰人，少都唔怕，好嘅一粒就夠。不過再positive嘅人，到呢一刻都會潰敗。

當然，我知道我要stay positive，否則啲旦旦可能更唔聽話。我要用堅強的意志捱落去，希望旦旦感應到，畀啲好反應我！

後記：Dr Tay頭先打嚟話聽日起要加多隻藥，唔知係咩藥呢？

踏上征途

決定了，就勇往直前！

今日day 2，返咗Dr Tay度，驗咗血，可以開始IVF。照超陰時，Dr Tay見到有一邊卵巢有3個小卵泡；其實照另一邊時我也隱約見到有一兩個，不過醫生冇講，我亦唔知係唔係

照完我問Dr Tay，今次係咪好過上次做IUI時（當時Day 3返去照，兩邊卵巢空空如也！）。佢話好咗，但估計我都唔會排到太多卵。佢一般唔希望太多，10粒上下就好了。佢估計我應該少過10粒，不過希望我會有多過5/6粒。我話：好啦，我用念力同你配合啦！佢呆咗一呆，望住我我話，咁我控制唔到自已排幾多卵架嘛，唯有用念力同你配合囉

今晚就開始打375iu Gonal-F，要自已溝藥。希望一切順順利利，唔好搞到上次咁（上次做IUI最後一早時老公玩到針都攣埋！）

如果順利，星期三開始要加埋抑制排卵針，跟住下星期三或四就會係抽卵的大日子！

今日一個好朋友打嚟（就係佢介紹我去睇Dr Tay的），準備追第二個的佢，試咗幾個月都未得。卒之捉老公返去一齊見醫生，驗完丁丁出嚟, morphology得1%佢有啲激動。不過時間真係唔等人，年過35，唔好話女人，男人的狀態都可能差好遠，尤其係少運動加上工作壓力大果啲。佢已經有一個好可愛的囡囡，唔會考慮IVF，但就想試試IUI。我就話，既然係試IUI，咁不如畀一兩個月時間老公進下補，可能丁丁有改善？我將我畀老公食嘅supplements話晒畀佢知，希望佢有用。最緊要係，希望大家一齊bingo，一齊做媽媽！

4月定7月開始好呢？

今日上QM聽埋講坐，再見埋Prof Ho。姑娘畀期我話6月可以開始喺QM做IVF，budget都要預6-7萬。話就話6月，但係5月嚟M要由day 21開始噴鼻，噴到6月嚟M至開始打針。因為我係月尾嚟M的，即係話真係要取卵同放胎，已經係7月嘅事。

我本來係預呢個月嚟M就搵Dr Tay開始做treatment的。M小姐早到咗1.5 day，即係話，如果照去馬的話，過兩個禮拜就做取卵同放胎。

老公今次都有去。見完醫生之後，佢話不如等6月喺QM度開始？原因係如果我第一次搵Dr Tay唔成功而又有雪胎的話，照計5月的cycle就可以用自然cycle放雪胎。但如果到時又夠期去QM的話，就要啲雪胎“再雪一會”。加上我有機會未來幾個月轉工，到時唔再係公務員，就連喺QM做IVF可以save的機會 (雖然只係慳幾千蚊咁大把) 都冇埋...

我自已心裡就想愈快開始愈好。加上而家嘅工作，忙到有點變態。難得計得到呢四個星期我都唔使出差，可以安心喺香港做treatment。我好驚拖到去6/7月，到時又唔知搞乜，失驚無神要出差，咁又係白等... 不過，喺QM做真係平啲，我又可以多幾個月儲下錢先，就唔使咁緊張...

唉，好難諗！拜託各位畀啲意見我！

btw, 老公又再驗咗丁丁，今次又有奇蹟！morphology竟然大躍進，升到10%!!!! 我聽到professor講時差啲以為自已聽錯！不過今次嘅motility就差咗，得番17% (1月時驗有30%)，唔知關唔關佢呢兩個月懶咗食supplement事 (但我有keep住久唔久燉冬虫草過佢飲）? Anyway，又係一個surprise! 希望之後嘅treatment一路都有good luck!

人算不如神算 (二)

三月沒有開始IVF, 因為呢個月工作太忙. 也慶幸沒有勉強開始到, 因為實在忙到嘔, 壓力極大, 仲要開埋通宵... 如果真係勉強要做, 果日就係開完通宵之後趕去醫院抽卵... 當然, 我事前冇估計過要開通宵的... 所以呢, 都話人算不如神算

冇開始做IVF, 就如期到了QM見Prof Ho. 以為要等好耐, 點知又ok喎! 約了兩點半, 去到姑娘做咗basicbackground search 同檢查後, 3:15pm就見到醫生. 初初見到佢, 覺得好似年紀好大咁. 可能因為佢有啲陀背啦 (或者係好嚴重寒背!), 縮縮下咁, 好以為佢好老. 但佢真係一個好有經驗好醫生, 檢查的手勢好好.

佢診斷都差不多, 大致都係覺得我冇大問題, 但老公的丁丁唔理想, 加上我已經37(係呀, 已經37了), 都係做IVF. 佢仲好似擔心我唔接受, 喺度勸我. 我話, 其實我預咗.

以為做公務員排私家隊冇著數, 原來都唔係! 入院同驗血呢啲, 因為係QMservice, 所以我唔使畀錢! 但其他做treatment, 因為係HKU medic條數, 就同大家一樣照畀囉. 佢叫我預六至七萬, 但我會比其他人平幾錢蚊咁囉 不過QM就唔會主動做ICSI, 除非啲精子真係好唔得... 我有少少擔心會影響咗fertilize機會

約咗3月24號返去聽講座, 聽完再見醫生就可以決定幾時開始. 我估我會排後少少, 因為想搵Dr Tay喺養和做咗第一次先. 如果Dr Tay度4月可以開始, 咁我排QM7/8月O唔OK呢?