報告近況

過去兩個星期忙到嘔白泡，真係唔講得笑！每日幾乎朝八晚十，瞓又瞓得唔好，一係攰得滯瞓唔著，一係發夢自己做緊N樣野。不過，呢啲日子終於過去，暑期的下半部應該可以輕鬆番啲。

其實我一直都冇諗過過去兩個禮拜會忙成咁樣。所以又係果句，上帝比我更清楚我的工作和生活。我之前果round唔得，而家諗番轉頭係一件好事，否則呢兩個星期都唔知點過，分分鐘又係小X，咪仲傷?! [嘻嘻，係咪好阿Q呢]

八月的旅行，去唔成澳洲，因為太貴了！平時由sydney去alice spring的內陸機return ticket只係A$200/head ，脹到A$5xx，所以都係唔去住了。結果，改咗去北海道！已經十年冇去過北海道，加上而家正值花期，可以去花田，真係未出發先興奮

姐妹們，呢排忙到冇時間寫blog，但我都有巡blog架！我會繼續為你們各位代禱，希望做treatment的一齊順利，放咗胎嘅BBs乖乖著床！

Time flies

話咁快，2011年又過了一半。

望番自己個網名"tigger"，我最初最初係好想生個老虎B，結果而家連rabbit都miss埋。寶寶龍唔知有冇我份？

Certified fail後諗過好多野，我諗我呢round放雪胎真係諗得太多，太多focus，個人好緊張，所以confirmed fail後好難接受。噚晚同老公出去發癲咁食海鮮（都唔記得自己幾耐冇食過了！）時傾偈，佢好scientific咁同我講，所有抽旦旦到人工受孕，到培育胚胎，喺lab嘅環境都係冇難度嘅事。但放番入去之後，胚胎長唔長，能唔能夠著床，就一切都係天意。

忽然間，我好似明多咗。唔係明多咗我點解fail，而係明多咗上帝要我學的功課。

生命在神手中，祂說有就會有，祂說給的就會給。

我盡咗力，就夠了。

我除咗諗住呢兩個月勁玩之外，仲諗住做番多啲運動啦，keep好自己身體。我都打算keep住睇中醫同針炙，但除這些以外，其他無謂野都係唔好做了。

既然我唔可以唔撈（因為會冇飯開），咁我就連無謂的leave都唔請，反正請咗喺屋企都係心掛掛，壓力好大，好似欠咗人咁。喺公司，做到忟都有人傾下呻下，日子仲易過啲，情緒都平靜啲。

算啦，係我嘅就會係我嘅。盡人事，聽天命。