各位姊妹, 我歸隊了! IVF戰隊又再出動!
今次其實好感恩, 上帝俾我有機會做呢啲IVF, 因為我平時M期好準, 正常話, 應該喺Dr Tay放完假之前就已經嚟M,
咁呢個月就做唔到了... 點知今次M小姐遲咗兩日出現, 咁就啱啱好喺Dr Tay返工的第一日係DAY 3, 順利可以開針. 不過, 今次只係做上半場,
原因有啲複雜 
因為我十月轉工了! 新工未必會舒服咗, 但係壓力會細啲, 飛少啲, 同埋多啲support. 返工地方好方便,
新老闆好nice, so far 都感覺良好. 今次其實係對方approach我, 傾咗足足4個月, 終於在上個月簽左約, 10月就report duty.
但亦因為咁, 我有啲擔心在呢個月做IVF, 萬一咁好彩BINGO咗, 咁一來唔知點同老闆交待, 二來會冇有薪產假 (根據勞工法例,
員工預產期距離上任日期不足40週的話, 僱主只需要放佢冇薪產假)...
不過, 當然呢些憂慮, 同成功BINGO比, 都係BINGO緊要些. 我就懷住呢啲疑慮, 一路祈禱一路等見Dr Tay.
估唔到係, 一照超陰, Dr Tay就皺晒眉, 因為我子宮後面果個纖維瘤大咗好多, 而家有4.x cm x 2.x cm. Dr
Tay話, 一般喺呢個位置纖維瘤唔會影響懷孕, 但係佢亦試過有case, 喺公立醫院做咗三次IVF都係poor response, 後來有醫生轉介佢來搵Dr
Tay做微創, 切左個纖維瘤. 結果呢個patient喺做完手術後三個月, 自然成孕. Dr Tay解釋話, 佢唔能夠話個瘤一定有影響,
但觀乎我上次的胚胎質素同我身體狀況都好理想, 唔成功可能同呢個瘤有關係都唔定. 佢建議我割左佢. 因為個瘤有機會同胚胎搶食, 甚至同卵巢搶食. 我決定聽佢講,
但做完呢個手術後, 要休息兩個月至可以再做IVF.
經商量後, 我決定今次做IVF的上半場, 照打針取卵. 希望胚胎生生性性, 靚靚仔仔, 咁就可以雪起. 到11月底左右,
就會做切除纖維瘤手術, 之後再休息兩個月, 過咗年, 亦等返工返定咗, 就放番雪胎 (假設有得雪的話). 咁做好處係, 始終早啲取卵,
旦旦質素理論上好啲同多啲, 咁可以有雪胎機會大啲; 而等到過咗年後至放胎, 一來可以俾自己時間適應新公司, 二來又唔使咁對唔住新老闆. 不過,
如果啲旦旦/胚胎質素 not good enough, 就唔雪得, 要即刻放番.
Dr Tay認為博得過, 咁我就搏啦! 同日驗咗血, everything ok, 星期一開始打針了.
仲有一個好消息, 我的FSH回落了, 得7.9!! 返去合格的水平啊
喺診所度遇到一個識咗好多年朋友, 上次遇到佢知道佢有咗, 但陀得唔穩, 今次返去又見到佢, 已經stable咗, 五個月了. 佢話有左之後, 時間會過得好快. 好快, bb就會出世. 見到佢真係好開心
我發現我心態開始變咗, 以前見到人大肚會心裡酸溜溜, 而家冇喎! 真心戥佢開心喎
