恭賀新禧

小龍在呢度同各位龍媽媽在龍年身體健康，BB們快高長大！



更祝各位等候龍寶寶光臨的心想事成，事事如意！

第N次產檢 ﹣ 21w4d

呢個星期個肚真係開始大了，體重也直線上升，比上星期又重了一磅。

星期二（17/1) 趁Dr Tay放假前做多次檢查，Dr Tay一路照，小龍一路郁，佢忍唔住話：小朋友，合作啲！

我就加入嗌埋一份：細路，冷靜啲！

不過佢照樣係咁郁，冇佢辦法。我唯有同Dr Tay講：無法，佢見到你特別興奮，去睇第二個醫生時唔係咁架！

在小龍極度活躍之下，Dr Tay好難至度到佢size。唔度由自可，一度：佢乜都大咗成week喎！而家有一磅重！

我睇番書，一般BB真係22w至有一磅左右。其實上星期五 (13/1) 喺林勇行醫生度照結構仲話小龍得350g，即係約0.7磅，今日又增磅了。細路，你係咪真係大得咁快呢（不過都有可能兩部機同兩個醫生唔同手勢，度出嚟有差別囉）？係的話唔緊要，但唔該你乖乖地留待39w開刀至好出世。搶閘的話會要爸爸媽媽使多幾千蚊，你最鍾意的Dr Tay又要為你捱更抵夜，咁就唔好啦

第一次飲糖水 (18w4d)

在2011年的大除夕，一早就去到QM飲糖水。對於平時飲嘢唔落糖嘅我嚟講，呢杯糖水係糖漿！不過好彩姑娘喺杯糖漿度加咗啲檸檬汁，味道係可以的，但真係甜到"lar“喉！但我唔使一分鐘就飲晒，因為想早啲搞掂，早啲可以食嘢。最辛苦係中間要等兩個鐘，我就同老公去”睇佢食早餐“。條友仲嫌份早餐唔夠食，食夠兩份！好彩小龍契媽打嚟吹水，時間至易過啲

不過呢個假期我過得麻麻地。我一向腸胃都唔好，唔會日日有廁所去；有咗之後要食埋materna就更差。我已經日日都食菜，但都冇用。呢四個半月嚟，一係去唔到廁所，一係肚瀉（部分係因為太耐冇得去導致overflow)...而肚瀉的後遺症就係令痔瘡翻發。痔瘡問題在大部分懷孕婦女都會出現，對BB係唔會有影響的，但最慘嘅係懷孕期間，只能用最基本嘅藥物... 即係冇用咁滯！翻發都係因為直腸損咗發炎，一般要7日至好得番。上次發的時候（懷孕六周）只係4日就好翻，但今次好慘，痛足我7日，仲係會痛到半夜痛醒果種，莫講話返工全日要坐喺office，簡直係酷刑！我成個假期就咁就冇咗，因為痛到個人好冇心機，又攰，結果除咗返教會之外，幾乎冇出過街咁滯！不過好彩，終於喺今日下晝開始die down，希望聽日返工唔使咁辛苦。

繼上次的頭槌後，只係感受過小龍在我肚皮下輕輕咁劃過一下。見其他姐妹開始感到regular的胎動，我都有啲心急。小龍小龍，得閒俾啲signals嚟feel下好喎！