小龍的第一個快樂聖誕

小龍和P牌媽媽過了一個快樂聖誕!

平日小龍一星期五日都喺屋企, 日頭凈係對住姐姐, 周末至有得去街街。難得假期又係聖誕，一於玩盡啲消耗下呢個爛玩BB的精力！
Parties由23/12開始，先來一個bb party, 不過小龍狀態欠佳，成日都眼瞓，凈係玩咗一陣就冇電！

24/12媽媽放工後又帶小龍去朋友屋企開Party, 今次小龍係最細的一個BB, 其他的都大至少一年以上。小龍坐喺Thomas the train的火車軌道圈內，化身哥斯拉摧毀每架路經的火車！！激死其他小朋友，小龍自己就喺度傻笑

25/12姐姐放假，小龍爸又開始冇電，下晝我第一次自己孭住小龍去咗Mega Box買禮物，跟住去咗對面個草地坐。係小龍第一次坐草地，又唔驚喎！但對眼就四圍望公園入便的其他小朋友喺度玩。呢個仔都係爛玩豬一隻！

坐完草地返屋企瞓咗陣，就同親友落會所食飯。親友的細女好鍾意同小龍玩，小龍好開心！

P牌媽媽又點會放過最後一日假期? 26/12我地又帶住小龍去探一個朋友，7個月大的小龍同朋友的14個月BB玩咗幾個鐘, 兩個都唔肯瞓覺! 終於捱到五點半, 小龍首次不支倒地, 朋友的BB爭扎多半個鐘都瞓埋. 大人們至有機會傾下偈. 其實朋友的BB傷風緊, 個鼻哥仔掛住兩行鼻涕, P牌媽媽同小龍爸知道竟然話繼續去! 好彩小龍冇病到! 叻豬！

highchair 之又愛又恨

小龍未出世就幫佢買咗張靚靚aprica high chair, 又可以當day bed, 大啲又可以用嚟食嘢. 誰知阿小龍唔LIKE!
除咗頭一個月未識爭扎時肯瞓之外, 之後一直都係極之勉強, 到有能力扎脫時第一時間逃走!

為免讓不受歡迎的high chair繼續霸佔地方, 上個月狠下心腸賣咗佢!
但小龍始終要開始食嘢, 又要籌謀買過張! 今次決定帶小龍去揀. 試坐過五六個牌子後, 小龍同阿媽一樣, 好識揀好識使錢

坐喺自己揀的龍椅, 個樣得戚得佢!

Stokke的highchair係貴, 但真係好好坐, 仲可以grow old with him, 坐到大個仔!

不過香港買好唔抵。喺美國原裝的tripp trapp係連埋安全帶，香港的代理就張安全帶分開賣。我後嚟上amazon買，全set買晒連埋shipping都仲平過喺香港買成千蚊！

btw, fisher price呢隻馬騮仔幾好玩，既可以掛喺stroller/car seat，仲有牙膠，小龍對之愛不釋手

可怕的牙仔!

小龍自四個月開始不時流口水, 啲牙仔吽足兩個月, 終於在6個半月"嶄露頭角", 不過惡夢而家至開始!

最初見到小龍下顎兩隻門牙仔走出嚟, 覺得好開心, 終於大個仔了！又想，出牙仔冇想像中咁辛苦喎！唔諗猶自可，一諗就大鑊了，因為好戲在後頭。

就在兩隻牙仔出現後的幾日，小龍瞓覺瞓得極差，日頭就半個鐘頭醒一次，夜晚就個零兩個鐘醒一次。晚上醒來了會爆喊，點抱都喊，仲流出斗大的眼淚，好淒涼咁...點收科呢? 要埋身俾佢啜至可以安靜落嚟, 仲往往食住瞓... 最初唔知咩事, 仲喺度諗點解個仔突然"返轉頭", 直到有一晚佢大喊見到猛大口仔, 原來下顎啲牙肉仔紅晒腫晒... 噢, 小龍, 媽咪怪錯咗你

一個星期過去, 小龍仲未有好輚。上BK睇，I'm not alone!! 好多五月媽媽都經歷緊相同的慘況... 唉, 我地冇得瞓慘, BBs又痛又唔識講, 仲慘。唯有希望佢快啲出到啲牙仔，唔使咁辛苦！