13w3d

又去見了Dr Tay，小龍長大得好快，上周五照oscar時才6.8cm，一星期過後的今天，已經是8.43cm
明明是13w3d的小小B，卻是14w2d的size啊
不過媽媽喜歡小龍大隻點，這樣才像我！媽媽當年出生是個9磅重的大BB啊！你婆婆常說媽媽好好湊，佢三個小朋友中病痛以媽媽為最少！你都要學好啊

雖然12月8日到贊育再檢查，但好似話冇得照超聲波的。咁好可能下一次要見你，要等4周後再見Dr Tay了，到時已經17周了！我會好掛住小龍和Dr Tay的 期間，小龍你要加油啊！一天一天長大！

給小龍的第一封信 ﹣ 寫在12 w 3 d

小龍：

終於可以給你寫第一封信，因為你在天父的恩典下，順利通過了媽媽最擔心的oscar test。媽媽是一個小信的人，眼見自己已屆高齡，身體各樣也不見得比別人優勝，就一直擔心唐氏綜合症會出現在你的身上。感謝天父給媽媽很多很多很支持並一直鼓勵媽媽的戰友姨姨們，她們用很多很多的禱告，托住了媽媽和你。昨天我由公司前往診所的途中，也一直禱告著。我彷彿看見天父的旌旗在前頭帶領著我們一家三口去迎戰，那一刻我就知道，我們得勝是本乎神。

媽媽躺在診症床上時，心臟卟通卟通的跳。我告訴你爸，心跳得很厲害啊！後來醫生叔叔進來，跟媽媽很親切的打個招呼，媽媽的心才沒有跳得那麼厲害。林醫生真的很專業，照了不消三秒就知道你是男還是女。其他醫生要照兩至三次頸皮取一個平均值或最低值，林醫生只需照一次就肯定的告訴媽媽：1.6mm, very good。媽媽聽畢，呼了一大口氣。

林醫生：你好擔心咩？
媽媽：擔心呀，我高齡呀嘛！
林醫生：唔使擔心，照埋其他先。

接著林醫生說你的鼻骨生得好好，心臟和肝臟都沒有問題。然後和媽媽爸爸一起數你的手指仔和腳指仔，只是你頑皮，將其中一隻腳仔收了起來！
後來醫生再換了另一部機，又照了你的咀咀，確定沒有兔唇，也見到你的兩隻眼仔。

醫生離開診症室時說：九成幾沒有問題！
媽媽：咁如果聽日驗血報告唔PASS呢？點算呀？
林醫生：唔PASS先算啦！不過我相信你九成幾冇問題，我好少錯嘅。
媽媽：我就係知道呀，所以專程嚟搵你照...
林醫生：多謝...

今朝媽媽收到姑娘的電話，確定你係very low risk：

T21 (down syndrome): 1 : 2 916
T18 (Edward's syndrome): 1 : 6 501
T13 (Patau syndrome): 1 : 21 738

媽媽真係好開心，因為小龍你好叻仔！明天，媽媽終於可以將有孕這個好消息告訴你的公公婆婆和祖母！

小龍，媽媽和你一直很努力，方能一起走到今天。前面還有不少潛在困難，我們要繼續學著依靠神去走過每一個關難。

媽媽

11 week 1 day

等咗兩個星期，再見到小龍，已經有4.32cm，exactly係11 week 1 day的標準長度。

照的時候，意外地見到小龍喺度玩蜈蚣彈！真架，佢真係成個彈起咗，超搞笑。跟住又雙手雙腳一齊fing，fing fing下又將隻手擺上頭上便...我真係估唔到，咁快就見到佢動作多多！

Dr Tay仲專登放大咗佢嘅頭仔，見到眼窩，鼻骨同埋個口。我問Dr Tay，真係鼻骨嚟架？佢話係呀，係初型。我聽到時，心裡覺得好似踏實咗一啲，因為一般人都話有鼻骨的BB，係唐BB的機會細啲。我唔知同而家照到嘅係咪講緊同一樣嘢，但心理上好似好過啲。

聽日就去贊育登記。Dr Tay千叮萬囑見到做OSCAR只係做一次好了，唔少人走去做多次，結果都搞到自己唔抽羊水唔安樂，因為兩次test總會有出入。佢話原來贊育係冇得做oscar的，要返去HKU做intergrated test，但就係喺12﹣13week時度頸皮，之後15week再去抽血。但做intergrated test要等result的話，我就趕唔切去養和交按金，所以都係按原定計劃去林勇行度oscar算。

仲有一星期，希望一切OK！