求舒緩壓力良方

這段日子, 各方面的事把我壓得透不過氣來!

首先是舅父病危, 情況太差, 香港的醫生不肯做一個極高風險的手術. 舅父由朋友轉介返左內地求醫... 一來擔心佢身體, 二來我對內地的醫療系統全無信心... 不過, 結果證明是我過慮了. 手術成功的完成了, 舅父也在ICU住了一星期之後, 剛轉回普通病房...而我, 就要每一兩個星期就請一日假跑回內地去看望他的情況. 雖然, 媽媽常說要返工就唔好去了, 但我堅持, 總覺得見多一次就一次, 因為舅父患的其實是末期cancer... 都唔知仲可以見多幾多次...

其次就是上司的調動. 一向"無為而治"的大老闆12月會調職, 調來的是一個令人風聞膽喪的超勤奮女子... 本來工作已經沉重得緊, 加埋一個極demanding的新老闆, 諗下都驚. 當然, 做好自己的工作, 也不用太擔心... 但工作關係呢家野, 好多時係人夾人, 唔夾的話可以死得好慘...

工作方面, 12月和1月本身就是高峰期, 期間至少有三個business trips, 加上做唔完的daily works... 所有野都要在農曆年前做妥... 我旗下的幾個"福祿壽"又幫唔到手(三個中有兩個係等退休的, 佢地唔搞事齋坐唔做我已經當幫忙; 另一個後生仔, 典型港孩, 乜都唔識, 教到我斷氣 ...). 再加上, 1月又要內部重組, 我要take up更多好challenging的duties, 出trip的次數只會有增無減... 哎...

凈係呢幾樣野, 已經壓死我. 再加埋生仔呢個大大難題... 我就快崩潰.

呢幾日感冒, 食完感冒藥本應瞓到死豬咁... 但我呢排晚晚都瞓唔到, 每一兩個鐘頭就醒一次, 仲要每次瞓返都發唔同夢. 一時發下工作, 一時夢見新老闆, 一時又出咗trip, 一時喺度諗到底做IVF定IUI好? 一時又發夢, 唔單止兩個close friends最近都公布有喜3-4個月(呢單係堅), 連兩個估佢唔到朋友, 都話有左, 仲要下個月就生得添 (呢單係發夢啦~)...

各位姊妹, 我就快癲... 點好呀? 救命呀~

排埋瑪麗的IVF私家隊

終於掟起心肝, 將已經ready咗兩星期的referral letter, sent去QMH度排私家隊.

排 Prof. Ho 已經排到三月頭, 唔計中間的紅假, 其實都係排三個月度, 都好reasonable

事緣呢兩日又感冒, 去睇西醫. 我睇左呢個西醫大約一年, 知佢以前喺政府醫院度做, 又喺衛生署做過, 對公營服務比較熟悉. 問起佢喺QM的IVF情況, 佢就話QM的成功率其實幾高, 應該高過私家醫院, 就算佢資料唔係最 up-to-date, 但都幾肯定QM的 success rate 唔會差過出便. 加上 Prof. Ho 喺做 IVF 而言係有名的expert, 佢建議我放心去排隊. 講到服務, 佢認為公立醫院其實都唔差, 不過要求去到私家醫院咁貼心就真係未必可以.

我其實係睇錢份上, QM一個 normal IVF pkg 係 HK$58,000 (計埋做ICSI), 仁安係$80-100k. 排定, 當買個保險.

希望到時唔使去到QM

明報: 人工授孕植多胎 早產流產風險增

原來凈係高齡, 至可以植入三個胚胎架... 哈, 我真係見識少

不過, 可能到我時, 我只會植入兩個. 我實在唔敢想像要自己決定打掉一個已經有手有腳的bb...

==========================================================

人工授孕植多胎 早產流產風險增

(明報)2010年11月16日 星期二 05:10

【明報專訊】常說一子難求，生殖科技為不育夫婦帶來曙光。有生殖醫學專科醫生表示，近年人工授孕的趨勢是「一個起、兩個止」，不少求診夫婦都很心急要小朋友，寧願懷有雙胞胎也希望「一次成功」，其實同時植入兩個胚胎，將把早產及流產風險由3%增加至約10%。

「大部分夫婦都選擇植入兩個胚胎，在香港很難說服他們只植入一個。」生殖醫學專科醫生蘇偉基解釋，接受生殖科技的父母多數很心急生孩子，加上要自掏腰包支付治療費用，故希望一次成功。植入兩個胚胎後，成功產下雙胞胎的機會率為37%，「對父母來說，生孖仔會更加開心，覺得幾得意」。不過他坦言，其實植入兩個胚胎有一定危險，早產及流產風險約為10%，植入3個的風險更高。

高齡植3胚胎 三選二合法

根據生殖科技管理局在2007年訂立的實務守則，只有35歲或以上婦女及有醫學證明的特殊情况下，醫生才可替她們植入最多3個胚胎。蘇醫生表示，如3個植入的胚胎胎兒全部成功生存，法例容許父母選擇「三變二」，待胎兒長至11至12周的5厘米大小、手手腳腳長齊之後，「選擇打掉其中一個『麻麻地』的胎兒」，以免「一生3個無力撫養，大家攬住一齊死」。

新藥劑增著床比例

蘇醫生表示，減少植入胚胎已成目前醫學發展的趨勢。新的「輕柔」治療方法，以「拮抗劑」配合低劑量的卵泡刺激素（recombinant），代替傳統的「促效劑」來促進性腺激素釋放，把3周的療程減少至7天，在女性經期來後第5天開始注射。由於新藥可使卵泡的成長較為成熟，抽取卵子的數目可由逾10個減少至4、5個，移植胚胎數目可由3至5個減少至1、2個。蘇指出，以臨床經驗來說，新方法能把平均植入2.7個胚胎數目，減少至2.2個，但胚胎成功著床的比例卻由15%提升至24%。

努力了一年的回顧

一年, 話長唔長, 但對於已經36歲的我而言, 卻真係話短唔短.

努力睇中醫睇左接近一年, 有咩成果呢?

• cycle由26-27day 變成 27-28 day, 啱啱呢個cycle甚至係29-day... cycle長番少少, 代表我的黃體有改善, 高溫期長番d
• period變成無血塊, 鮮紅色
• period期間唔會特別攰, 特別唔舒服

加埋西醫的check-up, confirm我:

• 兩邊輸卵管都係通
• 卵巢亦冇大問題 (係左邊出現了些少aging的情況, 不過醫生話正常)
• 每個cycle都有排卵
• 子宮少少後屈, 不過唔影響生bb

雖然未bingo, 但上述improvements/findings都唔錯吖

除左physical的improvements, 最重要係同老公關係好左, 感情好左. 起初唔唔肯去check, 大家關係有時都幾"彊"; 到後期, 佢開始意識到我好努力, 做晒所有check-up, 最後發現係可能係佢問題多少少...而家佢好合作, 肯食supplements:

• 善存 A to Zinc
• Maca
• 茄紅素

佢仲肯去睇中醫, 嚟緊下星期一, 就要開始佢針炙. 希望岑醫師幫到我地啦!

我亦斥資買入冬蟲夏草, 用埋食療配合, "盡地一煲", 務求喺12月底見Dr Tay前improve到佢丁丁... 到時聽埋Dr Tay的意見, 就要決定是否開始做IVF...

btw, 睇到八卦雜誌話李嘉欣係做IVM, 香港好似唔係好興, 有冇姊知呢? 成功機會又係咪真係比IVF高? 副作用係咪比IVF少? 好似仲平過IVF少少添... 有冇blogger知呢?

補充黃體針(二)

11月1日去打咗第二枝補充黃體針, 今次有啲痛. 一來可能因為姑娘手勢有咁好, 二來可能因為佢落針係位置好側, 直情側到去盤骨對落. 果度好sensitive, 有d 痛

問咗姑娘, 原來打補充黃體針同塞藥的效用基本上係一樣, 但針的話, 係刺激卵巢自己分泌多啲黃體銅, 塞藥就直接由藥物補充.

今個cycle, 打定輸數, 只係希望M小姐唔好咁早嚟, 我想我cycle慢慢長番啲, 去到28-day咁就至好嘞... M小姐, 生生性性, 最好唔好嚟搵我, 要嚟的話, 下星期一至嚟搵我, 好嘛