9 week 3 day

走到了9 week, 害喜的情況稍稍有改善, 每日只有兩段時間個胃比較唔舒服, 就係上午10-12時同下午5-7時左右. 奇怪, 一個唔規律的人develop出一個咁規律的pattern. 可能係小龍份人好有規律 也十分感恩, 至今一次都沒有嘔過... 雖然有時個胃辛苦到, 嘔咗出來其實會舒服啲, 但嘔唔出我又冇佢辦法

噚日再返去見醫生, 例牌之前擔心好幾日, 到底仲見唔見到小龍呢? 佢有冇長大呢? 好感恩, 小龍已經有2.4cm, 一切都按schedule發展緊 Dr Tay仲話: 你見唔見到佢喺度郁呀? 我隱隱約約見到佢喺度fing下fing下咁囉! 佢話: 係呀, 佢就係喺度fing下fing下囉! 我問Dr Tay: 係咪冇咗條尾架嘞? 佢話: 你當佢真係猿人進化咩, 邊有尾架 . 我心諗: 咁我睇啲video話胚胎初期條尾龍骨啱啱發展, 真係好似條尾咁架嘛....

每次見完ultra sound, 我一走入廁所就會忍唔住同小龍講: 小龍, 你好叻呀! 要繼續叻呀

由於我由7 week開始成日頭痛, 耳仔又成日塞, 上星期六走去睇番以前睇開果個中醫. 佢話我腸胃好差, 咁對個胎唔好, 仲話胎脈比較弱... 好彩佢意思唔係話bb有咩危險, 只係唔係好吸收到我啲營養咁解... 佢話我而家食的份量, 連我自己都未夠, 好難畀到bb... 但Dr Tay又話頭幾個月食唔到, 一磅都唔重都好正常, bb會吸我啲reserve (which I have too much and want very much that 小龍 would dry them up!!!!), 咁都已經好夠. anyway, 又係中西醫唔同說法. 但中醫開的藥, 真係幫我紓緩咗頭痛, 頭痛少咗, 耳仔都塞少咗. 所以我諗我都會keep住睇一排.

我到今日都未話畀屋企人知. 我啲close friends話, 驚我阿媽會嬲. 我都明白, 但我更加清楚我媽咪份人, 佢一定唔會嬲, 亦會明白我點解唔同佢講住. 我真係希望過埋oscar之後, make sure everything alright至話佢知, 等佢開開心心等做婆婆, 唔使我同一齊愁.

我阿媽真係超讚的! 我噚日食完晏發癲咁打畀佢話想飲酸辣湯, 佢二話不說就話, 我啱啱整完頭髮, 而家即刻去買料整畀你, 今晚拎畀你啦! 就係咁, 我噚晚帶咗兩大樽酸辣湯返屋企! 世上只有媽媽好啊!!!!

7 week 6 day

十天過去，又是時候返去見Dr Tay。一般人兩星期見一次醫生，我要10日一次，因為Dr Tay話要穩陣啲喎。

成日都患得患失，好驚再照時搵唔番小龍，又或者小龍唔再長大... 啋啋啋，小龍好好，今日已經有1.58cm，合晒標準

我要繼續食安胎藥，同埋每五日打一針安胎針。Dr Tay話，應該打埋呢round就唔使再打。

另一個好消息係，Dr Tay幫我book到養和呀！我知道book 養和係要Dr Tay親自打去同養和的婦產科主管傾，至有機會攞到位的。Dr Tay話，一般養和肯畀位喺佢度做IVF的patient，其他的人就好難book到。我雖然係IVF同鄉會會員，但今次正好唔係IVF bingo, 所以我都預咗未必會book到。而家OK咗，我知道Dr Tay一定係為我花咗唔少時間同心力，真係好多謝佢

喺過去10日，我已經：

﹣ book埋QM（贊育），11月10日就去登記
﹣ book咗林勇行醫生11月18日(12 week 3 day) 照OSCAR
﹣ 預約咗陪月

雖然咁早約陪月好似好誇，但都係早啲好。呢個陪月係我朋友用過，大力推介。仲雖然會收訂confirm booking，但萬一有咩大吉利是 (啋啋啋)，佢會還番晒所有訂金畀我。我覺得fair enough，就咁決定。回心一想，畀阿媽知道我用咁多錢請個陪月，實嚇屎佢。我細個時阿媽都有幫人湊BB，其實佢好好經驗，手勢好好，咩BB過佢手都唔會再喊，但阿媽真係年紀大了，加上呢幾年佢又斷過手又斷過腳，雖然已經好番晒，實在唔想佢操勞。更重要係，我唔想99同佢爭住湊，咁就大鑊了！所以都係用錢解決問題啦！

我諗住等過埋OSCAR之後，就去請工人了。而家工人又係好難請，分分鐘揀啱咗，一陣又呢樣又果樣又嚟唔到、一啲又臨出發大咗肚、一啲又話批唔到簽證...為免到時頻撲啦

希望之後都一切順順利利，最緊要係小龍要快高長大，健健康康！

6 week 2 day

踏入新階段，blog也是時候upgrade 了。希望不會為各為好朋友帶來太多麻煩

今日返到Dr Tay到，姑娘見我一到埗就想去廁所，截住我話畀我照先（因為要急急地至照得清楚），照完再等見醫生。

今次終於唔使照超陰，可以照肚。好快就見到子宮內的胎long。Dr Tay一路照一路話：我地今日達標架嘞，唔一定會見到心跳。我一早同自己講咗，見唔到閃閃唔好失望，最緊要胎long keep住長大，所以一直好緊張望住Dr Tay喺度左度右度...忽然間，Dr Tay話：你見唔見到呢到有一點白色，閃下閃下？Dr Tay邊伸手過嚟同我握手，邊恭喜我，我就仲喺度呆... 原來呢點就係閃閃了

奇妙嘅旅程就係咁開始了...

前面嘅路仲有好長，我仲有好多“大佬”要打！

嚟到呢一刻，我真係好感恩。因為我自已成就這一切的是神，不是靠我付出的任何努力。誰也沒有想過在IVF要call off，硬轉IUI的時候...在我剛轉工，忙到嘔電，仲要陪父母去旅行，繼續食魚生嘅時候... 在我還在籌算返新工之後幾時至可重新加入IVF大軍，還在擔心到時狀態只會比目前更差的時候，天父就為我成就了這件奇妙的事。

“生有時，死有時”，一切萬事萬物，在神裡都有定時，只是我們看不清。我們能做和該做的，就是繼續努力。只要唔放棄，總有一天會等到！

各位戰友，加油！我愛你們！