小龍的第一個快樂聖誕

小龍和P牌媽媽過了一個快樂聖誕!

平日小龍一星期五日都喺屋企, 日頭凈係對住姐姐, 周末至有得去街街。難得假期又係聖誕，一於玩盡啲消耗下呢個爛玩BB的精力！
Parties由23/12開始，先來一個bb party, 不過小龍狀態欠佳，成日都眼瞓，凈係玩咗一陣就冇電！

24/12媽媽放工後又帶小龍去朋友屋企開Party, 今次小龍係最細的一個BB, 其他的都大至少一年以上。小龍坐喺Thomas the train的火車軌道圈內，化身哥斯拉摧毀每架路經的火車！！激死其他小朋友，小龍自己就喺度傻笑

25/12姐姐放假，小龍爸又開始冇電，下晝我第一次自己孭住小龍去咗Mega Box買禮物，跟住去咗對面個草地坐。係小龍第一次坐草地，又唔驚喎！但對眼就四圍望公園入便的其他小朋友喺度玩。呢個仔都係爛玩豬一隻！

坐完草地返屋企瞓咗陣，就同親友落會所食飯。親友的細女好鍾意同小龍玩，小龍好開心！

P牌媽媽又點會放過最後一日假期? 26/12我地又帶住小龍去探一個朋友，7個月大的小龍同朋友的14個月BB玩咗幾個鐘, 兩個都唔肯瞓覺! 終於捱到五點半, 小龍首次不支倒地, 朋友的BB爭扎多半個鐘都瞓埋. 大人們至有機會傾下偈. 其實朋友的BB傷風緊, 個鼻哥仔掛住兩行鼻涕, P牌媽媽同小龍爸知道竟然話繼續去! 好彩小龍冇病到! 叻豬！

highchair 之又愛又恨

小龍未出世就幫佢買咗張靚靚aprica high chair, 又可以當day bed, 大啲又可以用嚟食嘢. 誰知阿小龍唔LIKE!
除咗頭一個月未識爭扎時肯瞓之外, 之後一直都係極之勉強, 到有能力扎脫時第一時間逃走!

為免讓不受歡迎的high chair繼續霸佔地方, 上個月狠下心腸賣咗佢!
但小龍始終要開始食嘢, 又要籌謀買過張! 今次決定帶小龍去揀. 試坐過五六個牌子後, 小龍同阿媽一樣, 好識揀好識使錢

坐喺自己揀的龍椅, 個樣得戚得佢!

Stokke的highchair係貴, 但真係好好坐, 仲可以grow old with him, 坐到大個仔!

不過香港買好唔抵。喺美國原裝的tripp trapp係連埋安全帶，香港的代理就張安全帶分開賣。我後嚟上amazon買，全set買晒連埋shipping都仲平過喺香港買成千蚊！

btw, fisher price呢隻馬騮仔幾好玩，既可以掛喺stroller/car seat，仲有牙膠，小龍對之愛不釋手

可怕的牙仔!

小龍自四個月開始不時流口水, 啲牙仔吽足兩個月, 終於在6個半月"嶄露頭角", 不過惡夢而家至開始!

最初見到小龍下顎兩隻門牙仔走出嚟, 覺得好開心, 終於大個仔了！又想，出牙仔冇想像中咁辛苦喎！唔諗猶自可，一諗就大鑊了，因為好戲在後頭。

就在兩隻牙仔出現後的幾日，小龍瞓覺瞓得極差，日頭就半個鐘頭醒一次，夜晚就個零兩個鐘醒一次。晚上醒來了會爆喊，點抱都喊，仲流出斗大的眼淚，好淒涼咁...點收科呢? 要埋身俾佢啜至可以安靜落嚟, 仲往往食住瞓... 最初唔知咩事, 仲喺度諗點解個仔突然"返轉頭", 直到有一晚佢大喊見到猛大口仔, 原來下顎啲牙肉仔紅晒腫晒... 噢, 小龍, 媽咪怪錯咗你

一個星期過去, 小龍仲未有好輚。上BK睇，I'm not alone!! 好多五月媽媽都經歷緊相同的慘況... 唉, 我地冇得瞓慘, BBs又痛又唔識講, 仲慘。唯有希望佢快啲出到啲牙仔，唔使咁辛苦！

給我的半歲小龍

小龍：

今日你六個月大了! 自你出生後，時間好像過得特別快，你出生的情景還歷歷在目，月曆卻告訴我原來180天己經過去了。昨晚我和你爸和回味你初出生的樣子... 那個頭仔只有半個巴掌大卻掛著一對大眼晴、手仔和腳仔皺晒皮、只有六磅兩安士的小BB，今天已經變成了一個面圓圓，十七磅多的大BB... 看著你每天長大，我們都很感恩，卻也很懷念你初生的樣子...



你的樣子每天都在變。變的速度快得讓我覺得太快了一些。猶幸一雙大眼晴沒有改變，現在臉上多了的，是你燦爛的笑容。



媽媽很喜歡你的小腳板。它們總在提醒我你的那不經風霜的純真無瘕。
我知道很快你會學走路，這雙腳板兒會學著承受你的體重，皮會變得厚厚的，漸漸也會出現因穿鞋子而造成的磨損；到你長大後，它們除了要承受你的身體，也一併幫你承擔扛在肩頭的擔子...如果可以，媽媽會代你去承受這一切風霜鍛鍊，可惜我不可以。但媽媽會在旁邊一直支持你、守護你，陪你走過以後的每一天，直到我不可以...



由四個月開始，你經常流口水，該是因為吽牙仔。自那天起，媽媽的乳頭經常被咬。教過你不可以咬，乖了一陣子，你又要耍頑皮！媽媽多次以為不能再餵下去了，結果還是捨不得你吃奶吃得飽飽時的那個满足的冧樣... 就這樣一直餵到今天。不過隨著媽媽工作重上軌道變得愈來愈忙，也是時候要停了... 雖然，我是萬分不願。小龍，你明白嗎？

小龍，媽常跟爸說笑：小龍唔曵時都幾乖
其實不是說笑的，你很乖，尤其在你熟睡時，媽常按奈不住要去親你...
小龍，你會讓媽親你多久呢？你會讓媽拖你手到何時呢？

爸媽都要上班，沒能每天待在家裡與你分享每分每秒，但願你知道爸媽都在為你努力工作，為求下班後馬上可以回家與你共渡只有一小時的qualtiy time。
周末不用上班時我們都很累很想睡，但能夠陪你玩，其實是媽的福氣。

半年過去，媽的熊貓眼變得更像熊貓、本身已粗壯的手臂變得更加粗壯，但抱著你總叫我心滿意足。

小龍，這半年來，你和我們一起過得快樂嘛? 希望你滿意我這P牌媽媽。


媽媽
2012年11月13日

四個半月的小龍

眨眼間, 小龍就快五個月大。BB一日一日長大, 每日都有新發展, 真係好神奇。

人地話三仆六坐九扶籬, 小龍三個月時完全冇翻身的意慾。眼見差不多大的BB都懂得翻身, 我又幫佢練習多啲, 但又諗, 唔咁快識翻身都好, 唔使咁快看牛仔咁看住佢。終於小龍喺第126日識得翻身 頭幾日學識就成日翻, 之後就睇心情! 呢隻小龍都係懶豬架嘞!

真正的好消息是在懂得翻身的幾日, 佢剛剛四個月半那天開始, 唔再食夜奶了。最後一餐奶大約半夜12至1點食, 食到6至7安奶, 之後就瞓天光到六點幾。中間會醒下或者發下夢, 但通常都好番可以揞番佢瞓覺。六點幾醒咗佢自己會喺床仔玩一陣, 過十零分鐘都冇人理佢至會叫醒我地。雖然而家佢瞓好咗, 但夜晚仲要喺佢想醒就幫佢轉下身, 等佢瞓定啲, 所以我都仲未可以享受一覺瞓天光

小龍而家好鍾意傾偈, 好鍾意笑, 好鍾意見到BB。早兩星期帶佢去開BB PARTY, 佢由頭帶到尾, 爛玩到爆!

BB長大的步伐實在太快... 我好懷念佢new born時候皺皮豬仔的樣... 原來轉下眼就唔見咗。上個月去探朋友的new born baby, 抱住個得6磅的人仔喺手, 赫然發現自己已經唔記得咗小龍曾經都係咁細個 ... 好彩, 我有啲先見之明, 搵咗個好友兼御用攝影師幫我影低佢new born果樣。剛滿月的小龍細粒到可以放入個籃度 呢個籃我會一直KEEP住, 等佢大個仔時睇番, 可以想象自己出細時幾細粒

小龍四個月半, 我們又去攝影師姐姐度, 拍了這張可愛的pictionary:


兩父子一齊睇波, 爆谷啤酒罐扔到一地都係... 哈哈, 係老豆生個仔出嚟都想發生的事! 預演呢一幕故仔, 個個見到都會心微笑, 尤其係見到小龍望住爸爸的笑容, 真係好可愛。呢啲就係父子間的默契

小龍一日一日長大, 願神和人喜愛你的心與你的身量一樣與日俱增。

小龍三個月大了!

小龍三個月大了!

開始返工後, 日子過得很快. 由小龍在我返工前 (wk 8-10) 每日扭三五七次眼瞓, 到wk11繼續扭扭扭扭扭, 到wk12開始, 媽媽夾埋褓母ee (即係陪月ee)一齊努力要小龍follow schedule, 到wk13初見成效... 時間過得好快. 眼見小龍進步咗, 扭少咗好多, 甚至而家玩到眼瞓時有時識嗌, 跟住一抱就好快瞓著... 我真係好開心.

呢個人仔而家好多嘢講, 瞓醒覺心情靚時會不停撩人傾偈同笑. 真係可愛咗好多.

原來, 當我覺得bb好難湊時, 可能只係階段性的問題. 他過了一個階段, 所謂問題就會好起來. 當然, 問題天天都多, 一波剛平, 另一波又可能再起, 都係要見招拆招. 但至少, 問題唔係永遠的. 想通了, 就覺得壓力細番少少...

不過, 小龍的睡眠質素尚待改善. 之前唔包佢對手凈俾佢著睡袋, 半夜的startle movement令佢對手fing嚟fing去, 好多時fing醒自己. 走去包埋佢對佢, 半夜四點零又會開始爭扎想抽番對手出嚟, 又醒. 上星期買咗個HALO sleepsack俾佢試, 諗住可以鬆鬆啲包埋對手, 佢冇咁辛苦, 又冇咁易抽出嚟, 以為好啲, 但又唔係真係好好... 呢兩晚索性攬住佢瞓, 等佢瞓冧晒至放開佢, 擺佢喺大床中間瞓, 佢就真係瞓得好咗好多... 我知擺大床瞓危險, 又怕佢第時唔肯走, 但佢真係瞓得好好... 而家諗住等佢瞓一個星期度, 等佢睡眠質素stable咗至放番佢去床仔睇下點...

意外收鑊係, 小龍上咗大床瞓得, 因為瞓得好咗, 已經連續三晚冇食夜奶, 抵讚 (shuuuu~ 唔好俾佢知)!

小龍兩個月了

轉眼間, 小龍兩個月了. 體重由出生時的6磅2安士, 升到11磅2安士; 身長由48cm加到59cm. 呢個仔都應該似爸爸, 高高瘦瘦. 體重係25 percentile, 身高就係75 percentile.

小龍愈大愈難搞. 食奶成日都唔肯正正經經咁食, 爸爸餵就更加玩嘢, 食兩安幾就瞓或者lur番出嚟. 我餵都仲好少少, 食到4-6安. 陪月ee就最穩定. 而家我最怕佢扭眼瞓, 一扭就發癲, 要半個鐘至九個字至搞得佢掂, 又搖又拍又飲水又掃風 (佢鍾意拍背)至有機會瞓得著, 仲要瞓唔冧... 瞓唔好又食得唔好, 有排都唔使旨意佢戒夜奶! 唯一係而家日頭基本上可以3.5鐘至食一餐, 希望快啲可以轉到4個鐘一餐.

我仲有一星期就要返工, 但姐姐仲未掂. 佢成日好似一舊雲咁, 乜反應都冇. 試過帶佢同bb返婆婆到, bb喊, 連我阿媽個工人都會起身想幫手抱, 佢仲係一舊雞咁坐喺度... 早兩日, bb一日扭咗五次眼瞓, 去到黃昏我真係好頂唔順, 自己都爆喊, 跟住鬧咗bb兩句, 我隻貓俾我嚇走咗, 我姐姐好明顯都俾我嚇親, 但依然係一舊雞咁坐埋一邊...

我而家唯有請陪月ee繼續幫我做baby sitter, 否則我返工都唔安樂. 但請baby sitter真係好貴，長遠都係要搵番工人湊。本來期望姐姐上手慢但總可以，而家我覺得機會好微，正密謀請過個姐姐，請祝我好運。

小龍病了....

唉, P牌媽媽真冇用, 小龍竟然剛滿六星期就得了傷風. 我問醫生, bb唔係仲用緊我啲抗體, 應該唔會病? 佢話, 你都唔係乜抗體都齊, 咁佢中咗隻你冇的, 就會病囉.
我明白傷風感冒箘變種極快, 但心裡仍然滿懷內疚...

食咗兩日藥之後, 小龍好番少少, 諗住唔好食咁多藥, 就自行將三次藥減做兩次, 點知鼻水就回歸, 小龍噚晚又冇覺好瞓, 夜晚都同日頭一樣, 三個鐘頭要食一餐 (平時佢夜晚可以隔耐啲, 大約四個鐘的)... 唉... 又係冇覺好瞓的一晚.

個個朋友都話bb愈大愈醒愈識扭計, 呢句說話喺小龍身上中晒! 由一個凈係瞓同食, 仲要可以自己玩完自己入睡的開心bb, 變成一個成日扭眼瞓的bb... 可能一來佢大咗精咗, 二來亦可能去街多咗, 又多人探咗, 搞到佢有啲over-stimulated... 我都係唔好俾咁多人上嚟屋企先, 如果唔係難受的會係自己.

開始要plan sleep training, 亦希望小龍快啲可以轉4個鐘食一次奶的cycle. 有冇朋友可以分享點幫bb由三個鐘一餐轉四個鐘呢? 小龍瞓得好就可以捱到3個半鐘, 瞓唔好有時2個半鐘都要食 (之前未病就好好, 準時三個鐘食一次)... 轉四個鐘一餐奶係咪一個"非流淚不可的過程"呢? 定係可以等BB自己轉呢?

奶媽唔易做!

在醫院, 小龍出世第三日就上奶. 雖然右邊乳線塞咗, 但有Mrs Chee幫手, 搞咗三次, 成績算唔錯. 泵出嚟可以有100ml, 當時小龍仲食緊70-80ml. 雪櫃有雪奶存貨, 心情好輕鬆.

但day 17突然再見紅. 我唔知係惡露未清定係嚟m. 正常唔會咁快嚟m, 但我阿媽話原來佢都係咁. 二來, 惡露未清唔應該影響奶量. 而我, 泵出嚟奶量由100ml暴跌至30ml... 心情直插谷底. 朋友話如果真係嚟m, 奶量會跌, 但三日左右應該回復正常.

滿有信心咁補住奶粉等三日. 第4日, 泵番80ml, 以為重見光明. 點知, 呢幾日都係最多80ml, 有時得番50-60ml...

之前個陪月唔好, 我對住佢心情又唔好, 食又食得唔好, 又唔敢放低小龍俾佢湊自己入房瞓, 搞到身心俱疲. day 21終於"炒之而後快"! 新陪月day 23返工, 我終於有五更飯食, 有雞食, 仲要可以放心將小龍交俾佢, 我自己入房瞓一陣... 但係幾時至recover度個身體可以造番多啲奶? 定係, 真係就咁就要"掛靴"?

呢幾日我已經勁飲代茶, organic mother's milk, 湯... 所有飲得的都飲... 但個人仲係攰... 唉...一日八餐入邊, 已經keep住埋身餵至少4-5餐 (每次40-50分鐘, 好多時仲要補兩安奶), 1-2餐泵奶, 2餐奶粉... 其餘時間泵得奶的就兩個鐘泵一次... 仲可以點令奶量增加呢?

美麗的七天

朋友都說在醫院的日子，對BB的印象最好。這句話是千真萬確的。

在醫院，定時定候去餵BB，換片/BB喊/唔肯瞓...全部你都睇唔到。你凈係會見到一個對著你用可愛小臉來要奶的BB。一切，當然美好...


小龍出生後，Dr Tay用了一個小時去縫傷口。真係慢工出細貨，他的手勢好到不得了。
返到病房依然清醒，見到家人，個個都見過BB了。那時他還未沖涼，醜醜樣樣的。
上月才中過風的外公，因為在同一間醫院，急不及待就坐輪椅上嚟要見小龍。意料不及的是，外公一見到小龍就喊起上嚟。坦白說，我們一家人相處了幾十年，也沒有見過我爸流眼淚。今次，是第一次。可能是小龍和他之間的生命的連繫，觸動了他的情緒。往後他好幾次再見小龍，都是激動得又哭起來...

用半麻一點也不累，幾乎沒有休息的需要。親友一個接一個到來，也沒有機會跟他們詳談。到傍晚，姑娘第一次將洗乾凈白白的小龍帶到我身邊讓我餵奶... 那種感覺還是很陌生，但把這個小人兒擁在懷中，實在說不出的感恩。

往後的幾天，每天都是跟時間表breastfeed。感激小龍沒有嫌棄還未上奶的媽媽，看準乳頭還是賣力的啜啜啜....就係因為佢幫得手，所以第三天晚上就上奶了！

第三天：食完奶昏迷了的小龍（開始收水，臉顩還是脹脹的）



第四天：收完水的等食小龍 ﹣﹣ 雙眼皮出來了


但噩夢隨之出現。第四天，早上還好好的，到傍晚覺得胸部十分脹痛，而家結了很多很實很多的硬塊。我自己幫自己按摩的效用不太，借了醫院的奶泵也泵不出來（姑娘話漲到實晒的話係泵唔出的）...唔出唔入的感覺好難受。想起約好了的lactation consultant說過今晚會來醫院（但之前幾晚都太夜，輪不到我），就發個信息請她務必來幫我通一下乳線）...一直沒有回覆，我也不寄厚望。當時還未知道情況有幾差...

半夜過後，平時只會嫌病房熱嘅我，突然發起冷，還打冷顫，顫了多久也不知道，連按鐘叫姑娘的力也沒有。那時護士長走進來（平時一定唔會半夜走入嚟的），原來我約的lactation consultant話佢啱啱收工，可以過嚟睇我，打去護士站問我瞓咗未... 我又估唔到醫院咁配合，可以半夜都俾人入嚟做treatment。但感謝他們的配合，也更多謝mrs chee的幫忙，佢半夜點幾鐘嚟到，幫我按到三點幾，解決了最迫切的問題... 翌日我見到Dr Tay時話俾佢聽，佢話好彩"you got a right person to help out, 否則已經發緊高燒“...

第六天拆線時，我望著傷口，不禁嘩然！點解個樣口可以咁靚？我凈係見到一條線，連縫針的痕跡也看不到！我忍唔住口花花咁讚Dr Tay，”你好堅呀！連線都睇唔到，仲要拆線完全唔痛喎！“

多謝他們的幫忙，我順利在醫院過了六天。

也多得小龍，媽媽呢世人收得最多花和hamper就係喺醫院的呢幾日

出院回家去，但朋友們都說我幫小龍著得太多衫，搞到變咗小雪人

母親節的意外驚喜

睇到個標題，聰明嘅你一定已經估到，小龍已經出咗世了。

本來約好39wk，22/5開刀，但小龍自己揀日子，母親節13/5出世了！

12/5上午在努力進行最後的家居改善工程。忙了一朝，中午發現自己流啡。打去Dr Tay診所，姑娘話未得住，但如果見多咗紅或者穿水或者開始痛就要再call，期間要bed rest，跟住的一個星期都唔可以返工（本來返工返到18/5)。

13/5零晨，見少少紅，不過都唔係多。半夜開始有contraction，用iphone app記錄，有時會8-10分鐘contract一次，痛就唔算好痛，持續一個鐘頭，之後兩三個鐘又冇咗。到零晨四點幾，又見有少少啡，無耐又開始contraction，又係8-10分鐘一次，比對上一round稍為痛少少，但都唔算好痛，又係持續個零鐘，之後又冇。我等到八點幾至call Dr Tay（實在唔想佢星期日都咁辛苦），點知佢已經喺養和做緊手術，佢聽唔到電話，交咗俾麻醉科黎醫生聽。黎醫生話，睇怕我都係作動，叫我即刻入院。

九點度去到養和check in, 姑娘話我都唔係好痛，可能唔使今日生。我話見咗Dr Tay至算啦～ 姑娘安排我上房，就撞到Dr Tay。佢叫我駁機先，佢食完早餐返嚟check。十點度，Dr Tay返嚟話，我真係作動，而且在20分鐘內已經有一次deep contraction。我話我唔係好痛咋喎！其實我心裡實在想小龍多留一會。不過Dr Tay話，都係要開刀架嘞，就安排手術室。10點半confirm開刀，轉頭覆番話1130可以開。姑娘幫我用極速準備，包括抽血，換衫等等，仲要食定啲藥。叫老公俾水我送藥，佢猛咁叫我睇熱，原來佢真係斟杯熱水過我囉！邊有可能食到啫！姑娘都忍唔住笑，仲要同後嚟加入幫手推手術床的姑娘講。更搞笑嘅係，當所有人ready去手術室時，姑娘唔敢行，因為我老公仲喺度食緊早餐！！姑娘都頂唔順，就話不如你晏啲自己落去？我老公至放低佢碗火腿通粉

其實我知佢緊張，佢愈緊張愈會慢，但真係激死

去到手術室，一切快到好似發緊夢咁。我心裡一直掛念喺肚裡的小龍。我實在實在好想佢可以多留在我肚裡一會，可惜...

見到Dr Tay，心情放鬆了。我同佢講，我唔係好捨得佢咁早離開我...Dr Tay望住我笑一笑，話好快會見到BB

打半麻醉針係最驚，但比想像中冇咁恐怖，只係大住個肚要屈身俾佢打針實在有啲難度。

打好麻醉藥，老公就入嚟了。佢suppose要坐喺我隔離，唔睇得手術過程。但條友超興奮，死要企起身睇。Dr Tay話，你驚唔驚架？佢話我唔驚架！Dr Tay就同佢講，你咪暈呀下！黎醫生就將塊手術布放低啲，我老公可以睇到成個手術過程，興奮到唔記得入嚟係要陪老婆，要我出聲話我個人開始震佢至拖住我隻手

當Dr Tay喺我肚度搵緊落刀位置，我好記得小龍又大力咁踢咗一下。佢可能係同我講，媽咪，我出嚟見你嘞！但我心裡就喺度諗：媽咪好鍾意你喺我肚入邊呀...

係最後一次小龍在我肚內的互動。我要好好記低呢個感覺。

幾分鐘後，小龍就出世了...

多謝小龍。這是人生中可一不可再的母親節。

望住呢個人仔，回想佢由一粒肉眼見唔到的小豆豆，一日一日咁喺新嘅恩典下，發展成我眼前的小龍。我實在無限感恩。若不是天父顧念我們，我們不會有小龍。


我真係好懷念小龍喺我肚入邊嘅日子。寫呢篇blog時，望住熟睡的小龍，眼淚不停流... 我好喜歡我眼前的小龍，但都好掛住喺我肚入邊的小龍。我知道，他們倆會好快合而為一，成為我生命裡唯一一個頭生的兒子，Samuel。

36w2d

昨天返健康院例行檢查, 告知醫生我近日半夜經常m痛, 平均個零鐘頭痛醒一次. 醫生說, 是我的子宮開始活躍, 有機會好快生, 不過我已經36w, 就算作動都唔使擔心, 都唔會有咩大問題. 但已嚇得我的心涼了一截 我爸仲喺醫院, 小龍又偏瘦, 好快出嚟? 唔係嘛? 唔好啩!

即刻打返Dr Tay度, yvonne叫我即晚返去check check. Dr Tay一聽到就叫我唔使擔心, 假宮縮話唔痛都係呃你, 好多人都痛, 仲會愈嚟愈痛. 佢話只要唔係愈嚟愈密同愈嚟愈regular就唔使擔心. 再去照ultra sound, 小龍瞓得好冧, 兩隻手仔一隻掩住左邊眼, 一隻遮住右邊面仔, 都唔知想點.

我最擔心佢重量問題, Dr Tay話佢呢10日好乖, 大隻咗好多, 重咗1.5磅! 由10日前的5磅7安士, 長到而家3.2kg, 即7磅多少少接近7磅1安士. 肚圍已經追番啱周數, 大脾長度長咗一周. 由於小龍腳長的緣故, 所以可能會估多咗重量, 出世時要預打番個折. 不過照咁睇, 小龍如果準時39w出世的話, 應該都有7磅重. 我個心即刻安樂晒

今朝再上磅, 個人終於重番少少, 由懷孕至今一共重咗14.5磅(過去10日, 靠隔晚食花膠燉鮮奶, 終於追番1.5磅!). 返工時望住自己個咁細的肚, 都真係覺得好神奇. 點解咁細個肚可以載住一個7磅重的人仔喺入邊? 佢仲會同你打招呼, 又會打泰拳同kick boxing, 仲成日打"思抑"... 上帝造人真係好奇妙. 我深信天父已在看顧尚在母腹中的小龍.

老公前日開始感冒, 噚日我終於中招了... 喉嚨發炎, 鼻又塞晒. 但老闆今日啱啱出完trip返嚟, 有好多嘢要同佢follow-up, 頂硬上照返工啦. 希望下晝開埋個會可以閃人返屋企休息. 我實在唔想病

給小龍的信 - 35w3d

小龍：

你在媽媽肚內的日子，眨眼間至走到尾聲。你每朝早五時許會醒一轉，踼我一輪後又會瞓番。到七時許就會起身，然後一輪kick boxing。多得你，媽媽現下不用較鬧鐘也不會唔知醒起床！希望你出生後也是如此的一個有規律的孩子。媽常想，人可以自律，就任何事都能做好。這是媽媽對你的一個小小期望，做個快樂又自律的小孩。

小龍，或許你知道爸媽近日都忙得透不過氣，因為外公兩星期前中了風。你或許還不理解什麼是中風，簡而言之是外公現時右半邊身體不能動，要在醫院休息，讓醫護人士協助他康復。到底他能否全然康復？媽不知道。但外公年紀大了，恐怕要變回以往一樣會有一定難度。現時媽媽和外婆每天都要往醫院跑，實在沒有時間好好照顧你，所以你更加要努力，在媽媽身上多吸一點營養。早兩天再去見到Dr Tay，說你身長腳長，但肚圍較細，是個瘦少的孩子...媽媽聽後很擔心，實在知道是媽媽這段日子常往醫院跑去照顧外公而忽略了多休息，讓你多點機會吸收。現下外公的情況穩定下來，媽媽會預留多點時間給你，希望你能爭取餘下不足4周的時間，能長多少就長多少！

媽媽終於把你的衣物都洗好了！實在是一項偉大工程！沒想過一個小小初生寶寶會有這麼多衣物... 今天一早，爸媽吃早餐時看到久休復出的太陽伯伯，立時回家把你的床舖都一次過清洗。接下來的日子就是要把你的床和戰車準備好！

早前爸媽把你的床仔拆了箱，砌好了，才發現原來砌一張BB床是一點也不容易。也發現媽媽太貪心，給你買了一張大而舒適的床，但把它放在睡房的話，連通道也沒有了 媽媽唯有立即在網上找一張細一點的臨時床，供你初生頭幾個月用。

http://www.armsreach.com/index.php?main_page=product_info&cPath=3_18_7&products_id=38

這張床的好處是，給你睡幾個月後，可以將床墊的位置降下，就會將床仔變成一張play pan，等你懂得坐及企時，可以有個地方玩 但由於張床要由美國訂過來，要到五月底才到呢...可能有幾天還是要你在書房睡，當然，媽媽也會到書房陪你（你爸就發達了，到時他可獨霸睡房！）

小龍，媽媽會多喝鮮奶和吃花膠，你要努力吸收啊！

好快就與你見面的媽媽

30w6d - 血拼第二擊

一路話唔買咁多衫俾小龍，因為好快唔啱著，加上有好多朋友啲BB啱啱好大小龍一年左右，啲舊衫會過比我。

但係做媽媽嘅，本身就鍾意買衫，而家就會將購物慾，發揮晒喺個仔身上...誰叫carter's一而再減價？我實在抵受唔住誘惑



係好多，咁又唔係全部for new born嘅

左上角的是簿身包被，但買咗返嚟至發覺好似唔係好夠簿。如果洗完水都發覺唔OK，可能要買過幾張簿啲嘅summer用。旁邊bearbear同duckduck係沖涼用大毛巾，用嚟包住BB上水的。

中間果行第一包係換片墊cover...本來我以為係換片墊，買咗返嚟至知係得個cover（online shopping有時就係咁），而家又要買過換片墊！
中間兩包係mides買的和尚袍同兩用長袍。本來覺得美棉的實在好soft，但個價錢太靚，實在唔捨得。其實mides的全棉衫仔本身質地已經好好，就慳番啲啦
右邊粉藍色的是comme ca 的連身衣，帽仔，袜仔同埋口水肩，又係趁半價時候買的！將會係小龍出院時著的戰衣。我買咗3-6mths的，希望小龍真係大隻啲，否則唔啱著，就要改旁便啡色小馬騮的套裝，0-3mths的

前方三件分別係fleece睡袋同連身衣。carter's大減價US$6一件，實在唔買唔得，留番冬天著。

右上角的那些...係24個月至著的...抵買嘛，橫掂都要寄，咪買埋囉




左上角是12個月的.... (呢個阿媽真係好似有啲變態，咁早買定！）

旁邊兩個奶咀夾，實在太可愛，唔買唔得！
右上角是兩張fleece 被仔，一厚一簿，冬天唔使再買。
仲有一啲burp cloths，係等BB過一兩個月條頸仔硬少少可以直抱時，墊住膊頭等佢唔使“損”我地件衫，同埋掃風時用的。仲有口水肩啦，手套仔啦，同兩對鞋仔（出街見人的話，有對鞋仔著好睇啲嘛）。

已經陸續收到朋友的baby shower禮物。朋友們真係好知我的style，買俾小龍的衫仔，唔係黑就係白

右邊果件係for new born, 真係好細件！我諗連我隻貓女都唔啱著！老公問，乜細件成咁？我話，newborn baby可能真係咁細，得果6﹣7磅，仲要收下水，可能真係差不多。件衫仔好有意思的，背後有對天使翼，寫住heavenly sent, and simply adorable 小龍真係天父給我們家最好的禮物，好希望呢件衫仔可以俾小龍著住嚟影newborn portrait