30w6d - 血拼第二擊

一路話唔買咁多衫俾小龍，因為好快唔啱著，加上有好多朋友啲BB啱啱好大小龍一年左右，啲舊衫會過比我。

但係做媽媽嘅，本身就鍾意買衫，而家就會將購物慾，發揮晒喺個仔身上...誰叫carter's一而再減價？我實在抵受唔住誘惑



係好多，咁又唔係全部for new born嘅

左上角的是簿身包被，但買咗返嚟至發覺好似唔係好夠簿。如果洗完水都發覺唔OK，可能要買過幾張簿啲嘅summer用。旁邊bearbear同duckduck係沖涼用大毛巾，用嚟包住BB上水的。

中間果行第一包係換片墊cover...本來我以為係換片墊，買咗返嚟至知係得個cover（online shopping有時就係咁），而家又要買過換片墊！
中間兩包係mides買的和尚袍同兩用長袍。本來覺得美棉的實在好soft，但個價錢太靚，實在唔捨得。其實mides的全棉衫仔本身質地已經好好，就慳番啲啦
右邊粉藍色的是comme ca 的連身衣，帽仔，袜仔同埋口水肩，又係趁半價時候買的！將會係小龍出院時著的戰衣。我買咗3-6mths的，希望小龍真係大隻啲，否則唔啱著，就要改旁便啡色小馬騮的套裝，0-3mths的

前方三件分別係fleece睡袋同連身衣。carter's大減價US$6一件，實在唔買唔得，留番冬天著。

右上角的那些...係24個月至著的...抵買嘛，橫掂都要寄，咪買埋囉




左上角是12個月的.... (呢個阿媽真係好似有啲變態，咁早買定！）

旁邊兩個奶咀夾，實在太可愛，唔買唔得！
右上角是兩張fleece 被仔，一厚一簿，冬天唔使再買。
仲有一啲burp cloths，係等BB過一兩個月條頸仔硬少少可以直抱時，墊住膊頭等佢唔使“損”我地件衫，同埋掃風時用的。仲有口水肩啦，手套仔啦，同兩對鞋仔（出街見人的話，有對鞋仔著好睇啲嘛）。

已經陸續收到朋友的baby shower禮物。朋友們真係好知我的style，買俾小龍的衫仔，唔係黑就係白

右邊果件係for new born, 真係好細件！我諗連我隻貓女都唔啱著！老公問，乜細件成咁？我話，newborn baby可能真係咁細，得果6﹣7磅，仲要收下水，可能真係差不多。件衫仔好有意思的，背後有對天使翼，寫住heavenly sent, and simply adorable 小龍真係天父給我們家最好的禮物，好希望呢件衫仔可以俾小龍著住嚟影newborn portrait

30w4d - 媽媽病了

感謝神，懷孕旅程當中，一切平安。除咗初期肚瀉了兩次，同埋受到痔瘡的困擾之外，其後一切大致安好。最煩人的流鼻血問題，在最近幾星期都因為天氣潮濕已紓緩了

水腫時有時冇，不過記得飲多啲水果排就好地地，唔記得飲水就嚟料！中醫話腫得快，BB有機會早出世，我都係小心啲好。我實在唔想小龍在開刀日子前跑出！

不過前晚半夜就突然好得人驚咁，瞓到半夜個人發冷，係發到不停打冷顫果種！明明室內溫度有成20度，又有冚好被，唔知搞乜？我即刻叫老公拎張羽絨被出嚟，冚咗成個鐘個人至冇再震。

但到臨天光，個人就開始熱，仲出汗添

一瞓醒八九點就message喺美國的醫生朋友（香港啲朋友，星期日冇咁早起身嘛），問佢意見使唔使去睇醫生？明明朝早好精神，但總覺得發冷發成咁實在有啲唔妥。我朋友話睇怕係infection，最好都係睇醫生穩陣啲。返完教會就去咗St Paul's Hospital，confirm係病毒感染，但由於未有其他病癥，所以醫生只係求其俾左啲panadols我...唉

好在老公提我攞定今日醫生紙。本來都仲爭扎緊放唔放的，但今朝一早（30w6d)，已經肚痾咗兩次，睇怕係感冒箘入腸了...就安心喺屋企休息一下，home office算了。

29w5d

水腫在恢復按摩之後消失了，總算見番自己一雙正常的腳。但這幾天肚子在不斷長大，肚皮的張力有時張得令我感覺肚子快要爆開了一般... 肚子是大了，但還不夠圓。希望趕得切在4月初影大肚相之前，變成圓圓渾渾的一個肚肚

28w6d時返到Dr Tay度，照到小龍已經有1.5kg。醫生說他是一個medium size baby，到39周開刀時應該有6-7磅。吓？我想小龍大隻啲喎！於是我決定進入我的high protein diet!

懷孕頭三個月朝朝食一個烚蛋加high calcium milk，過咗三個月已經頂唔順，食唔落蛋，凈係可以繼續飲奶。relax了三個月，而家又再重要過食蛋的日子。起初每朝食兩個烚蛋白，但食了兩三天已經叫救命，後嚟轉了早餐一個烚蛋，再在晚飯加蛋...希望自己每日可以食到兩隻蛋，加埋high calcium milk同及低脂芝士，另外盡量多食點肉... 但我必須說，咁樣食法個人真係好辛苦！加上我本身腸胃唔好，經常會便秘，而家唯有飲密啲西梅汁，希望攞番個balance。

小龍，媽媽為咗你會繼續努力的！

媽媽的medela奶泵，終於到了！shipping的duration比預期的長，二月初訂的，三月初才到。好彩早啲訂咗，否則我又會等到好心急。喺網度訂就係抵過喺香港買好多，呢set freestyle，連埋運費只係香港代理零售價的一半！ 希望佢幫到我，早日上奶！我希望可以餵到半年人奶，靠晒你嘞，medela!



工人姐姐的問題，經過十多天的努力，終於解決了。老公終於揀到一個佢認為OK的工人。其實對工人我唔挑剔，反正都係睇彩數，有人頂住先就好。希望一切順順利利，姐姐可以喺小龍出世之前到。

28w - 水腫

終於, 踏入3rd trimester. 距離小龍出世, 仲有唔夠90日... 忽然之間, 覺得時間過得好快.

1st trimester想時間走得快點, 但時針分針偏偏好似食咗豬油咁, 左望右望都未過...

2nd trimester真係honeymoon period, 好似變番未有bb咁, 好精神, 做乜都得. 個個weekend喺度整嘢食, 又開始幫小龍shopping...

但由6個半月開始, energy level 就慢慢走下坡... 之後只會更攰... 睇怕又要回覆每個weekend要預留時間瞓晏覺的日子

由26週開始就出現水腫. 我本身係易水腫的人, 但見之前一路都好地地, 以為ok啦. 點知26週起, 有日著番起一對啱啱有咗時買的平底鞋, 竟然覺得窄同埋腳背的青根唔見晒, 我就知道出事了... 去到上產前班, 第一堂就教老公點同老婆按摩, 個導師一望到我對腳就話: 嘩, 你開始腫囉, 要按多啲嘞!

老公聽到, 好乖咁幫我按咗幾次, 水腫真係消咗, 磅數都跌咗三磅.

但有人躲懶, 冇按個幾星期, 水腫又返嚟嘞 明明星期六上過磅, 事隔三日今朝再上磅, 竟然差咗1.8kg??? 點食都冇可能3日重4磅啩???? 望下對腳, 又嚟料!

青根無晒不特止, 連腳眼都冇埋咁滯

唯有叫老公按密啲. 星期四返健康院產檢時問下醫生可以點搞先!

呢張係我上星期影的肚肚相. 去到27周至有個見得人少少的肚肚

27w4d ﹣ 工人姐姐放飛機！！

原來，第二孕期真係過得好快。買下BB嘢，開始上產前班、母乳班，啲weekends根本唔夠用。
好彩啲公司好多都可以keep貨一兩個月，大部分大件的東西都還未送來。不過可以想像，不出一個月，間屋就會變貨倉

上個月知道工人姐姐的工作簽證已經出咗，同agent約咗3月30日接工人姐姐。跟手同designer confirm晒間書房點改裝，等姐姐嚟到有床瞓。點知，呢頭confirm晒，個agent就打嚟話姐姐放飛機好彩我早啲請啫，如果唔係臨時話唔嚟，咁我咪俾佢一鑊蹺起？而家起碼仲有時間再搵，但都未必趕得切生之前就到！呢幾日發咗癲咁四圍發散朋友幫我問，多得幾個朋友有好的referral，希望搵一啲剛完約的，或者有做過湊初生BB但返咗鄉下的姐姐。冇咗姐姐，真係會好愁

各方好友，如果你地有好介紹，都麻煩你地幫幫手，拜託拜託

未請姐姐的，真係好快啲手。而家請湊new born真係好難！

截至今日為止，重咗12磅！希望keep到凈底的10個星期，每周唔好重多過一磅啦
至於小龍，24w6d時check過已經有850g, 即係接近一磅。要到28w6d再返去照至知幾重了。