關於黃體不足的問題

多謝咁多位bloggers關心, 原來好多人都想知多啲關於黃體不足的問題。以下係我在網上搵到的資料, 比較簡單易明, 同大家分享

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

黃體素是由黃體分泌，而黃體乃是由濾泡在排卵後，顆粒細胞蛻變形成的，黃體素作用在子宮內膜上，使腺體增生、肥厚形成適合受精卵著床的內膜並可減少子宮的收縮，以利著床，一旦著床懷孕，胚胎的胎盤慢慢形成，並分泌荷爾蒙逐漸取代黃體素的分泌，在大約胎兒8週大時，便可完全取代卵巢黃體素的分泌，因此在這段期間若是黃體素的分泌不足，便有可能發生早期流產的現象，甚至影響在更早期的時候，使胚胎不易著床而導致不孕。

所以更正確的說法應該是黃體素不足不會影響精卵之間受精，但卻可能影響著床，甚至造成早期流產。

黃體不足的診斷並不難，只要劃婦女基礎體溫便可窺知一二，若是高溫期低於10天者便應高度懷疑是黃體不足，便須進一步在月經週期的後期抽血檢查黃體素，若黃體素小於12 ng/ml便可證實。

補充黃體針(一)

今日係第一次打補充黃體針. 由於老丁丁report麻麻地, 我都冇乜期望. 不過醫生叫打就即管打啦! 仁安的姑娘手勢好好, 開始press藥水時仲問我痛唔痛, 我話ok喎! 佢就話我忍得. 其實我喺度諗緊, 枝針插得好淺咋喎, 我針炙時枝針仲插得深啲... 我都已經習慣晒針炙, 又點會覺得痛呢

呢個cycle我day 15至排卵, 如果照平時26或27 day-cycle的話, 咁好明顯係黃體不足了, 高溫期太短, 所以咁耐都唔成功, 可能我都有份contribute. 希望今次打咗針, period可以長番少少, 應該有至少28-day至正常啦...

今日打完第一針, 下星期一仲有一針... 打完第二針, 要隔幾多日唔嚟m至要check呢

給討厭"五姑娘"的老公們

哈哈, 其實唔少姊妹的老公, 都好似我老公咁, 一話要做semen analysis就妞妞拎拎. 說穿了, 其實係因為唔鍾意"五姑娘"

原來用"五姑娘"得到的丁丁, 喺quantity同quality上面都會有影響, 因為"出"的時候有壓力; 尤其係喺診所至"出"的丁丁, 雖然好private, 但因為環境陌生, 都會影響丁丁的quality, 特別係vitality喎... 原來呢, 美國已經有種product叫collection condom, 可以好似平時用domdom咁, natural intercourse後取得丁丁... 咁樣, 不單老公壓力細啲, 出嚟丁丁quantity同quality都好會啲. 美國人唔單止用嚟取丁丁做semen analysis, 亦會喺做IUI時用, 因為會多啲gd quality的丁丁!

不過如果喺online shop買, 一set已經要US$15, 仲要運費差不多US$30, 好鬼貴!

四圍搵, 搵到一間喺香港有代理的, 我寫咗email去問, 有冇得散賣 (一盒30個). 有消息再同大家share

下一步: IUI or IVF?

呢個星期, 知道老公的result後, 我真係好努力! 星期六去打了一個鐘 tennis, 星期日又做咗半個鐘頭 gym (全部30mins都係aerobic exercise). 做 gym 仲係捉埋老公一齊去的! 當然, 佢啱啱開始, 做得15mins aerobic exercise, 但都好吖, 至少係個開始.

我星期六再去見中醫時, 報告咗照輸卵管同驗丁丁的result. 我話佢知morphology得4%, 點知佢話, 世衛的最新標準已經調低咗去5% (vs 之前的15%). 不過, 佢話事實上15%係定得太高, 5%又定得太低. 佢個人經驗係, 大約morphology去到8%, 就可以natural conception.

醫師話, 畀一兩個月時間老公improve吓先, 如果丁丁有進步, 咁就算要做treatment, 成功機會都高啲.

我想, 如果真係幾管齊下係improve到, 可能佢分分鐘去番個比較靚仔數, 可能到時natural都搞得掂 (妄想中)

我有少少心大心細, 係咪應該做住treatment等呢? 定係natural住等呢? 因為12月20日我就會見Dr. Tay, 到時我會要老公再驗一次, 睇吓啲counts點, 因為我想聽埋Dr. Tay意見至決定, 係咪真係做IVF. 做唔做一次IUI先好呢?

努力? 加油?

坦白說, 有時候聽到朋友講, 叫我再努力啲, 繼續加油時, 實在有點反感. 好似講到我好似好唔努力咁 查實我好努力了... 仲可以點努力啲添呢

我知我咁諗好幼稚, 但果刻的情緒係好真實. 但事後我又明, 人家除了跟你說加油和努力, 或可以說什麼呢?

所以, 都係果句, 要繼續加油同努力!

IVF?

今日去了仁安覆診, 老公亦驗了丁丁.

照超聲波, 左邊卵巢見到卵泡, size各方面都ok, 但未排得. 估計要day 14-15至排 (今日day 12). 以我26-day cycle計, 我黃體銅係唔夠, 要打針補充黃體銅

周醫生本來想開口叫我下個cycle做IUI, 點知一見到老公丁丁的報告, 面色一沉...

motility: 15% (vs >50%)

morphology: 4% (vs >15%)

跟住就話, 睇怕只能夠做IVF...

老公個樣無晒表情. 周醫生見佢咁, 就話想試IUI都可以試一次, 下個cycle返嚟, 試吓洗咗之後夠唔夠數啦, 夠就做IUI, 唔夠, 就要諗IVF. 不過佢都話, 可能我老公瞓得太少 (佢算早瞓, 但日日都係半夜四點幾起身就睇美股...), 影響咗...

其實我心裡一早預咗會係咁, 而家反而relax咗.

我估我老公好唔開心, 但佢冇講, 凈係唔出聲 我就同佢講, 一來可能因為佢壓力好大, 丁丁至會唔好啦; 二來, 我地一齊做多啲運動囉; 三來, 試吓我朋友介紹maca, 睇吓好唔好啲? 最後, 仲叫佢星期六跟埋我去針炙, 睇吓幫唔幫到手? 唔使咁絕望

再者, 就算真係IVF, 咪IVF囉, 仲可以減少非優質胚胎的情況... 咁都冇壞啫...

佢一路聽, 凈係點頭, 冇出過聲 哎...

我叫咗周醫生寫埋信俾我去QM排. 起初以為公家証有公務員隊 (我係公務員嘛 ), 可以唔使等咁耐, 但原來係冇架 (我實在太天真)! 打去問, 姑娘話要排兩年... 打去私家隊, 好快喎, 見QM的醫生都明年一二月, 如果見HA的醫生, 就十一月已經可以. 姑娘話兩邊用藥都一樣, 基本上冇分別... 你地話呢?

我諗住諗埋呢幾日, 下星期拎到周醫生referral letter, 就去排定QM的私家隊. IVF咁貴, 一定要搵啲平啲方法至得

輸卵管造影

噚日下晝喺仁安度做咗輸卵管造影, 醫生一放完藥水就已經告訴我, 兩邊都係通

一早有心理準備, 過程會"唔係幾好受", 但去到醫生用鴨咀挾"撐"開子宮頸時, 忍唔住縮了一下. 好彩醫生跟手好快就放入導管同埋波波(防正條管走位), 跟住話最辛苦時間過咗了... 我至呼一口氣... 之後放藥水等等, 都唔覺得痛lu~ 晚上只係有少少見血, 應該係正常情況

喺仁安度做, 一來覺得醫院設備好啲, 安心啲. 二來, 護士同醫生都好pro. 個護士喺醫生未入嚟之前, 不停同我傾偈, 又話晒成個過程俾我知, 叫我唔使驚. 好得佢, 我喺等候十分鐘入便,冇乜諗過啲唔等洗嘢, 跟住醫生就入嚟, 講解程序後就開動. 簡單嚟講, 係連驚時候都冇

總之而家, 又過一關

最後一個test, 就係老公semen analysis, 希望佢都ok, 咁就可以做IUI

btw, 我有個住係日本朋友介紹我食maca. 佢話日本男女個個諗住生小朋友都食. 中國人以為係強精藥, 實際上係男女都食得, 可以自然調節hormones. 我上wikipedia search過, 又好似真係好天然咁, 冇乜負作用... 我呢個朋友試咗五個月都未有 (佢後生過我), 後嚟research發現呢隻嘢, 食咗個幾月就preg咗... 有冇人試過呢?

岑醫師的意見

中環的岑醫師是過去一年, 看過的第四個中醫. 感覺他不會拖症, 亦不會要你使無謂錢. 對上一次覆診是Day 26, 曾不多開估, 佢凈係幫我針炙, 唔使我飲藥. 原因係, 得同唔得藥會唔同, 加上我五日後(即噚日)又覆診, 無謂浪費

噚晚覆診, 佢一路幫我針炙一路口up up, 話我身體上冇明顯徵症, 當然, 最好照埋輸卵管, 咁就可以好安心. 我同佢講, 三個西醫 (包括一個婦科同兩個生育科) 都話我個case唔使照住, 係照都等做左IUI一次之後, 發現唔通至去照. 始終, 照輸卵管都有d辛苦. 佢就話, depends 啦, 做一次IUI成萬銀, 照次輸卵管就三兩千, 照左先其實冇壞. 佢話, 如果照左係ok, 老公丁丁又唔係太差, 其實都仲可以自己試. 我話, 我36囉喎! 佢話, 可能我見得病人多, 你算係好後生, 仲有時間可以自己試.

以上的對話, 我唔敢同老公講, 費事佢持住醫師咁講, 下星期又反口唔去驗丁丁

姊妹們, 照輸卵管要day幾照呀? 有咩好介紹? 定係等星期四返去見周醫生時等佢轉介?

因為照完輸卵管果個cycle最好避孕, 我就諗係咪可以今個cycle做埋呢? 橫掂仲要等老公驗丁丁, 呢個cycle無論如何都已經做唔到任何treatment (除左natural IUI, 但natural IUI的成功機會唔會好大, 我又覺得冇謂嘥錢), 係咪應該把握時間, 早d check埋呢?

噚晚為左呢個問題, 又瞓唔著

醫師噚晚仲口up up講多樣野. 佢話我condition ok架嘞, 不過見到我對大手臂同埋儲有豐厚脂肪的肚腩, 就話可以試吓減啲磅啦! 應該有少少好處.

其實, 我都知, 過去兩年我重左10磅, 真係時候搞搞佢. 等我plan plan我的減肥大計先

後記：

火燭鬼性格的我，終於喺下晝secure到一個喺仁安照輸卵管的booking，仲要係下星期一，即係day 9就照，perfect! 周醫生好好，專登打電話嚟brief我照的過程係點，有咩風險。今次咁心急，麻煩到佢真係唔好意思！希望到時順順利利啦！

I'm ready to go!

我係一個"鱷魚頭, 老襯底"的人, 表面看來好堅強, 實際上成日諗野諗埋一邊, 會鑽牛角尖, 好鬼"灰".

上個cycle的完結, 意味我要認真決定是否踏入做treatment的路. 之前成日講笑咁同自己/老公講, 就算做treatment都冇壞, 分分鐘到時運氣打孖上, 一次搞掂, 唔使再煩. 但心裡面, 我不得不承認壓力好大, 尤其當我不停求醫都搵唔到問題所在(唔包括我老公, 只係講我自己), 尤其我要承受埋老公果份壓力...

自問從來無試過好似2010年咁乏力一年, 工作唔順利 (工作左十幾年, 第一次遇到滑鐵盧), 連生仔都唔順利. 我從來都知自己唔會係好lucky咁try一兩個cycle就成功的人, 但冇諗過一年過去都唔成功.

day1果日, 表面我冇乜野, 好似預左咁. 實際上個心好傷. 忍唔住猛咁問神, 點解? 點解? 點解?

"點解"呢個問題, 我好多年都冇問過, 因為我知道, 好多事冇得解. 但今次, 實在忍唔住. 我甚至覺得, 天父已經拎走晒我所有盼望和歡樂...

不過, "做人, 總要信!"

今朝返工時, 天氣好舒服, 腦內又浮起一首讚美的詩歌 "何等恩典". 我唔明白為何在這等心情下, 還有詩歌atuomatic咁在腦內loop, 但那一刻我感覺良好. 返到公司, 坐埋位, surfing緊各位戰友的blog, 睇到一個個經過好多努力後成功的個案, 突然想通了. 或者, 天父讓我有機會去經歷做treatment, 係想我見多樣野, 經歷多樣野, 豐富我的人生. 如果係咁, 求天父使用我的經歷, 日後可以成為別人的幫助, 就好似我從各位bloggers身上得到很大很大的鼓勵和祝福一樣.

姊妹們, I'm ready to GO!

失望 (updated)

失望的，不是因為今個cycle failed again，而係對我老公的態度。

 

今朝一早見到m小姐，我就同老公講，你真係要去做semen analysis啦。佢當然明我講乜，但冇出聲。我忍到夜晚，諗住攤開嚟問佢，到底你有咩打算？佢支吾咗五分鐘之後同我講，“我其實唔係好想生仔”

我心諗：你又玩嘢呀！知道要去做test，就同我講唔想生？有冇搞錯呀！太過份！

我用EQ壓住自己嘅情緒，一路繼續問落去。佢話，冇諗過生仔咁麻煩；而家想生都咁麻煩，第時生咗仲要湊，仲麻煩！

我真係冇諗過呢啲說話嚟自一個快將39歲嘅男人嘅口。

我當時真係灰晒

佢同我講，都係自然懷孕最好。我話，我夠知啦，咁而家自然唔到嘛！邊個叫我地咁老至嚟諗，年紀大就係難架啦！咁而家事實擺在眼前，一年都唔得咯，咪試吓醫生嘅treatments囉！正如你病咗，例如生cancer都要做treatment啦！佢話，“咁點同呢？！”我回應話：“有咩唔同，不育唔係病呀？你咪以為行得走得，個人就冇病至得架！唔check點知？check咗有問題，又點解唔去醫。”

佢dead-air。講到呢啲嘢，最叻就係唔出聲

經過一輪曉以大義之後，我再問佢，“係咪決定唔生啦？”

佢又dead-air咗五分鐘，之後話，“做埋個test先啦！”

我個樣而家仲好平靜，但個心，真係好嬲

 

後話:

喺有100個嬲情況下, 當然係瞓唔著. 輾轉反側到三點, 當中又忍唔住喊... 卒之攪到老公都醒埋... 佢見我咁, 終於都主動"氹"番我, 仲幫我massage膊頭, 等我可以快啲瞓...

其實我都知, 我老公其實係知衰架, 所以最後話做埋個test先, 等佢自己好落台...

我只係嬲, 點解啲男人成日都係咁, 講埋啲白知低能不負責任說話之後, 自己走去大覺瞓? 最後又要覺得後悔?