第一次睇生育輔助專科醫生

距離見Dr. Tay的日子仲有三個月. 八月時, 在朋友介紹下約左另一位唔使排咁耐隊的生育輔助專科醫生. 等左兩個月, 噚日終於見到佢. 老公都有陪我去

佢問左我一D period的情況下, 就同我照超聲波, 話我有輕微子宮後屈, 左邊卵巢size較細, 卵泡數量亦較少, 可能係左邊卵巢開始aging. 但佢話我己經36, 開始出現aging都好正常. 又話我子宮後屈都係好輕微, 應該唔會對懷孕有影響. 佢又confirm左我呢個cycle已經排左卵, 內膜有11.2mm, 好正常咁話.

後來老公入埋嚟, 就同我地講解佢分析同建議. 佢話, 我情況睇嚟冇乜大問題, 但因為已經36, 唔應該再等, 佢建議我做IUI, 但做IUI之前都必須老公驗左精先. 佢話, 其實35或以上, 試左半年都未有的話, 可能唔係雙方有咩問題, 而係歲月不饒人, 機能開始老化... 所以應該開始做treatment. 佢話做IUI, 可以每個cycle"谷"多啲卵子出嚟, 咁就增加懷孕機會, 不過要接受到有機會出現雙胞胎或多胎. 我心諗, 咁不知幾好, 一定過搞掂, 唔使再煩

醫生本來建議老公橫掂都嚟咗, 叫佢留埋丁丁. 姑娘仲帶我地去參觀咗男士專用的"留丁丁房", 不過老公都係話, 如果今個cycle都唔得至留啦... 我知我老公係迫唔嚟, 所以都冇勉強佢

我覺得今次見專科醫生最大收鑊係, 老公親自聽到醫生好全面的分析, 同埋好清晰咁知道, 有啲野唔可以再等運到. 我見佢聽時候"乸"埋晒口面, 我估佢今次真係"聽到"個message.

其實, 我心裡雖然一直覺得做IUI冇乜大不了, 但心裡著實有些少抗拒. 我會諗, 我period咁正常, 又有排卵, 應該唔使去到做treatment啩. 但係, 事實真係唔係咁. 做treatment其實係buy time, 亦可以增加成功的機會. 當然, 我會擔心d hormone藥對身體有影響, 但相信一切喺醫生monitor下發生, 應該都係安全...平時食埋食埋咁多藥, 都對身體唔好架啦... 有時做人真係應該阿Q啲, 唔好諗得太負面.

題外話:

不得不讚, 我老公真係進步左, 肯為我多左. 我今日返工又唔記得帶藥, 頭先打畀佢, 問佢今日使唔使出去(佢平日係home office的), 如果出開去見客就拎啲藥嚟office畀我啦... 佢話今日唔使出去, 但都拎畀我啦... 真係"巧梗動". 各位sisters唔好覺得好奇怪, 我老公係一個好self-centered人, 以前喺屋企 (喺屋企範圍入邊), 叫佢順手遞啲野俾你, 佢都唔肯, 話者做完都有說話俾你聽... 就係因為佢係咁, 所以結婚頭四年都覺得, 未ready去生bb... 直到我踏入34/35歲. 希望我老公繼續"生性", 我地又有luck, 唔使真係去到做treatment, 否則我驚佢又要用another half year or more 去接受呢件事.. 咁搞得嚟, 我就37/38嘞...

終於可以吁一日氣！

噚日睇咗另一個中醫。診所雖然喺中環，但比較簡陋，醫師比我想像中年輕。呢位醫師，睇佢個website仲以為佢係老中醫，原來都只係五十上下，好似喺廣州讀醫，算係好早期註冊做中醫的一批執業中醫。

去到見唔到有人龍，心裡有丁點覺得意外。因為以往睇親的醫師，大都要排隊。原來佢每小時凈係schedule睇4個病人，時間manage得比較好，所以唔使嘥時等。

見到醫師，說明來意。我告訴他我試了9個月都未有。佢問我地有冇做check-up，我說了一些，簡單而言，是男女都未有做最detail的check-up：老公未驗丁丁，我亦都未照過輸卵管。佢把完脈，自言自語：冇乜嘢吖，係脈細啲啫。跟住佢問我有冇其他病痛，生活有冇其他問題。我說我睡眠質素較差，差的時候每兩小時會醒一次，好的時候也極少可以一覺瞓天光，不過醒咗之後，去個廁所或飲啖水之後，都可以瞓番的。佢就話，咁都ok，唔係急醒同瞓唔返的話，基本上都可以。我再問醫師，我的狀態點呢？佢就話，冇乜大問題，係血氣差少少，但係應該唔會搞到懷唔到孕。不過，中醫睇唔到輸卵管有冇問題，所以都係去check check好啲。但你check輸卵管之前，都係先生check丁丁重要，因為佢佔咗40%。依你的身體情況，基本上應該冇乜問題。

我聽到的時候，心裡就係吁了一大氣！為免影響佢，我專登冇同佢講先前個醫師同我講嘅嘢，等佢自己把完脈斷症，好彩佢的初步診斷都幾positive。佢都叫我要keep住做運動啦，咁應該ok嘅。

佢幫我針炙時，我真係幾感動喎。佢見到我身上的針印，知道我針開，就問有冇針幾個比較特別的位置，包括頭頂同前額，仲有小腹兩側。我話冇呀。佢就話，咁即係佢冇幫你搞過睡眠質素同啲濕疹喎。跟住仲燒枝艾喺我肚臍位。以為佢施完針，我就瞓住等啦，佢原來每兩分鐘入嚟睇吓我，仲會轉一轉啲艾的位置，第一次係對正肚臍，第二次係左側，第三次係右側。如是者，每兩分鐘轉一轉。坦白說，係第一次見中醫咁樣keep住每兩分鐘照顧一下你，仲要分先後咁加微電嚟刺激穴道（我之前睇過一個老中醫，都係間中入嚟轉吓枝針，等啲針“氣”可以刺激穴道，但真係未試過有佢咁密；之前睇果個醫師，就一開始駁晒電，全部20分鐘）。有次入嚟見佢拆晒啲針，以為搞掂，點知仲有背部同頸部，今次唔使燒艾，佢就交畀助手間唔時嚟睇吓我！針完出去攞藥，畀完錢轉身想走，又畀佢叫住，仲來仲要貼耳穴！嘩，咁好抵啫，七百蚊有找，乜都做晒！仲咁好服侍！我真係感動架！

其實我係一個好易話為嘅病人。從來都同醫生好合作，亦傾向信任我睇嘅醫生。咁耐以嚟，上個醫師係我生命中第一次遇到的一個令我懷疑佢醫德的人。到現在，我都只能夠話係懷疑，因為我實在冇真憑實據話佢講嘅嘢唔敢。但係喺我噚日針炙期間，我同呢位醫師講起上一個醫師對我的comment，佢第一個反應係：“佢憑乜嘢咁講呀？冇證冇據，點可以咁講呀！除非check咗知道你輸卵管唔通啫！”佢就叫我下次帶埋之前睇過的藥方，特別覺得好嘅同唔好嘅，都畀佢睇吓，等佢可以參詳。我就問，點叫做唔好？我有話畀佢聽，我成日半夜個身發熱，有時會熱醒，咁可以令到自己唔熱醒，舒服咗，係咪就叫好？佢話，係呀，因為你本身個底會發熱，啲藥啱嘅咪可以紓緩，唔啱嘅你咪keep住會繼續係咁。

我明多咗一啲嘢。我轉中醫呢個決定，應該冇錯

點都好，我會keep住remind自己，睇中醫係調理！我要用一個最好的狀態，去接迎我的小天使！

主若願意, 我必可以

發生中醫事件後的周末, 因為連續兩日要做姊妹, 根本無時間再諗. 噚日再在internet度做下research, 諗住去中環另一個中醫度試試. 不過我同自己講, 要抱住純為調理的心態去睇, 否則, 我只會令自己再有唔開心的機會.

其實今次呢單中醫事件, 於我而言係當頭捧喝. 其實上星期日返崇拜, 講員已經在講, 我們在前路茫茫時應抓著神, 不是仗著人的知慧和聰明. 但知易行難, 還是希望倚靠人的智慧, 雖然不是我的智慧, 卻也是想仗著各位醫生的智慧. 直到上星期五發生果件事, 天父彷彿在向我說: 你以為你可以抓住佢來幫你咩? 佢幫唔到你, 仲令你消沉... 我一直在等你, 守護你, 難著你不知道麼?

天父愛我, 我又如何會不知?

昨天下班的路上, 雨下得很大. 腦內浮起了少時常唱的一首詩歌:

"非勢力, 非才能, 主說: 乃靠我的靈成事."

今天起, 我每清晨都要向神呼求, 求天父按祂的心意成就我的願望.

主若願意, 我必可以!

要轉中醫了．．．

本來諗住搵個喺中環的中醫，方便一啲，唔使過海。係貴少少，但係預咗，因為喺中環嘛，舖租都貴啲啦！

第一個次睇佢，撞正排卵期，佢話我的脈膊比較弱，唔似已經食咗半年中藥（睇佢之前我睇咗另外兩個中醫半年）。我當時諗，可能果段時間我已經停咗兩個月冇食中藥，所以keep up唔到啦。唔緊要啦，咪再開始囉！

到第二個星返去，佢話我啲脈“返晒嚟”，仲話我可能好受得佢嘅針炙。我不知幾開心，仲開始慶幸搵到我令我咁快可以boost up的醫師。加上我地濕疹+牛皮癬亦都好咗，仲四圍介紹人去買佢隻藥膏。

到第三個星期，等派彩。佢摸完脈之後，我問佢似嚟m定似bingo，因為我對上個cycle個胸不斷脹痛，仲第一次感覺到nipple會痛。但同時我心裡又覺得自己唔係咁good luck，所以冇check捧捧。佢笑笑口話，我好識問問題，跟住答我50-50啦。我當時感覺佢都幾tricky。當然，呢個亦係最play safe的答案。

到第四個星期，m小姐已經嚟咗。佢一摸脈就話我啲脈又沉晒，即係我個底真係好弱。我問，咁即係點？佢話照我脈象睇，我至少要食中藥同針多半年。吓？咁即係點呀，請佢再elaborate，佢話一個月好難睇得準。

我有話畀佢聽嚟緊會見生育科。佢又話，好吖，一般生育科會叫你食排卵藥先啦，咁可以check住，因為中醫睇唔到有冇排卵，亦唔會知道卵子的size，睇生育科就可以check到，咁我一邊用西醫check住，一邊用中藥補身，咪好囉。佢跟住又話，你呢個年紀，睇怕去到佢同你做完一大輪test就會叫你直接做ivf架嘞（吓？佢又知？唔使睇數據？how about所有數據都好ok呢？加上個醫生係我一個朋友睇過，佢都冇做ivf喎！）跟住佢就愈講愈興奮，話我個case，基本上“唔大機會可以natural有bb”，睇怕都要做ivf，做ivf期間仲要一路以針炙輔助至得！

我心諗，唔係嘛？中西醫不同途我理解，但冇乜理由兩個個西醫話我一切正常，去到中醫佢話我唔做ivf唔使指意有bb吓嘛？

加上我睇過一共三個中醫，另外兩個都唔係咁講架喎！另外兩個都話我腎脈係弱啲，但係冇乜基本問題喎。老中醫話隨時可以preg，另一個男中醫話而家我未係最好狀態，最好gear up咗至生bb，咁個bb健康啲，會好湊啲。但從來未有醫生話我唔得到一個地步係唔做ivf唔使諗

我聽完未識嬲，凈係覺得好灰　到下晝，心理壓力大到不得了。我好驚我真係佢講到咁差。明明之前個個醫生／醫師都話我基本ok，最critical的一個都係話，我而家嘅狀態就算生到，都可能未必畀到最好嘅畀我個bb，但都冇話過我「唔得」。我接受唔到囉！跟住成個下晝極唔開心，開始懷疑自己．．．

返到屋企同老公講，佢話，哎，好多醫生都係sales嚟架咋！我唔明，佢就話，唔話得你差點叫你check呢樣check果樣、繼續睇佢、畀錢佢賺！

如果呢位女醫師真係咁，我真係覺得好失望。當然，我無憑証話佢就係sales，但佢令我咁唔開心，我諗我唔會再睇佢嘞。我從來唔係一個諱疾忌醫的人，但我真係唔明點解佢可以：

• 第二、三個星期睇佢時講到我狀態咁好，as if佢的藥同treatment喺我身上好effective；但轉個頭就話我其實好weak，要至少半年或以上至可以改善。

• 一時就話一個月睇唔準，一時就話我個情況睇怕唔做ivf都唔可以有機會preg，仲要一路做ivf一路針炙至有機會
• 呢頭話我腎脈咁weak，冇乜機會己preg，另一頭就話其實中醫好多嘢都睇唔到，叫我去睇生育科keep monitoring，等佢可以配合用藥

天呀！你玩晒啦！

咁即係無論點，我要繼續畀成五／六千蚊個月你？如果你嘅功力就係講上述呢啲唔使負責任的comment，我仲可以繼續畀五／六千蚊個月你，我咪好stupid？

算啦，我都係搵過個平實啲、實話實說的中醫，慢慢調理。

坦白講，去到今時今日，我都急唔嚟。不過，一個有真材實料、supportive的醫生／醫師好重要。我地呢啲人，等極都未有，心理狀態已經唔好，再加埋呢啲凈係喺度危言崇聽的醫生／醫師，只會令我更難受。

感激...沿途有你們

不得不說, 很感謝天父, 為我預備了同路人.

在我的朋友圈子中, 最多出現的都是那種"掂下都有"的媽媽, 話想生仔, 一個cycle, 最多兩個就搞掂. 曾幾何時, 我都以為生仔好易.

原來, 當我拎呢個"生仔好難"的話題出嚟傾之後, 至發現面對緊同樣困難的朋友, 大有人在. 只係, 中國人不習慣將自己的問題暴露於人前.

話閘子, 由一位比我年輕的女朋友小產的故事開始. 那年她31, 本來興高彩烈的暗示, 話就快有好消息... 但事隔一個月, 她沉默了... 我意識到她出了事... 她同大部分經歷不幸的人一樣, 躲在家裡, 捱過了最痛的一個月. 當她開始復原, 才告訴我們原來她的period一直唔準, 可以3x-day, 又可以4x-day... 食了6個月排卵藥, 仲喺第6個月時照埋輸卵管... 終於bingo了... 可惜小生命在她子宮裡住不夠8星期就丟了...

之後的一年, 想生bb想得快瘋了, 還沒有得償所願. 原來, 32歲, 一切正常, 生育也可以是如此困難.

我想生bb, 起步得比身邊朋友都遲. 在朋友眼中, 我從來是一個工作至上的人. 說實在, 也的確如此. 直到34, 發現"大限"將至, 才認真的想想這問題. 之後, 我開始各樣的打算. 首先要說服老公, 又開始準備買樓... 到真係開始, 已經35到尾... 哈, 我well-planning嘛... 但生仔這回事, 人算不如天算.

當朋友們都已經離開了"想生仔想到發瘋"的日子, 我才遲鈍的踏入這階段. 但感激身旁這些好友, 也感激各位曾在路上走過這段路的bloggers, 陪我走這一段路. 沒有妳們, 我的路肯定更難走, 我亦無法走好.

在感激妳們的同時, 我決定不可以沉溺在"想生仔想到發瘋"的日子. 未來, 中醫會繼續看, 亦希望見生育科醫生時, 確切掌握自己的身體狀況. 但在精神層面上, 我要釋放自己. 我打算去學幾樣活了三十多年都苦無良機學習的東西, 好似油畫, 唱歌, 亦會多啲整嘢食... 我要告訴自己, 好好享受還沒有做人媽媽的消遙自在, 因為好似你地所講, "驚喜隨時出現"

祝各位等候驚喜的朋友, 盡都如意, 驚喜話咁快就到!

心情有點down... part 2

其實我知我唔係真係試左好耐, 實在唔應該無病呻吟... 但呢兩日真係有點down... 甚至有 d 轉牛角尖

在腦內盤旋的問題包括:

• 咁多年來, 一次bingo都未試過 (有避孕同無避孕的情況下)... 會唔會係我機能上有問題呢?
• 婦科醫生一直話我一切都好正常, 又話未夠40, 唔使驗卵巢功能... 咁點解咁多姊妹又會知自己FSH幾多?
• 婦科醫生又話, 我子宮內膜在cycle內有0.8-1.3mm厚, 好正常, 咁但係我cycle偏短 (得average 26日), 係咪黃體唔夠? 但今個cycle 中醫師同我勁補黃體, 補完都係唔得, 咁跟住可以點?
• 以前未諗生bb, m前一切好smooth, 冇乜特別話嚴重經痛, 或者胸痛... 而家乜都有. 係我敏感, 定係個人出左問題?
• 如果真係一切正常, 點解咁耐都未中? 研究數字又話, 75% 人會在半年內bingo, 90%人可以在一年內bingo?

都話轉牛角尖, d 問題係打晒困籠的, 仲要不停loop

希望呢 d 問題, 29/9見dr chow時可以問, 佢又唔嫌我煩啦

長路漫漫

m小姐遲了兩天, 還是找上門了...

些少失望, 但仲manage到... 不過, 同每一個月面見m小姐一樣, 難以自制又再催我老公去做semen analysis... 有時我覺得, 我每個月花咁多時間心力去improve自己的condition, 佢就繼續"話之我"... 有時會負面咁諗, 條路好似得自己一個喺度行...

星期六見醫師時佢都話, 得同唔得好多時真係在乎心情, 因為個人緊張, 影響到hormone分泌, 就影響成孕. 好多時無心插柳至會柳成蔭. 佢仲叫我, 繼續做運動, focus工作, side track自己的attention. 唔諗, 就會有意外驚喜

噚日崇拜講員講得好好, 當我們發現前路茫茫, 伸手不見五指時, 更應定睛看著主耶穌, 因為我們可以依靠的, 不是人的知識和聰明. 一切得與不得, 在乎我們能否全心信靠...

我的好處不在神以外, 我要相信天父不會留下一樣好的東西不給我! 我要加油, think positive!

放榜無限次...

聽日, 又夠期放榜...

而家的心情真係好奇怪, 每晚都覺得好攰, 但每晚都難以入眠, 瞓著左, 兩三個鐘頭又醒一次. 翻來覆去, 不停諗以下的嘢:

- 生命在上帝的手裡, 給與不給, 都在上帝手中, 我不應憂慮

- 得與唔得, 其實已經係定數, 我諗都冇用

- 我其實唔應該瞓唔著, 反而應該盡量爭取休息, 為懷 b做準備

但愈諗, 就愈辛苦...

過去八個cycle, 有feel冇feel乜都試過, 最明顯係上個月由排卵後一直胸痛, 痛左12日, m小姐來前兩日開始不痛了... 結果失敗了...

呢個月, 排卵後三/四日至開始有胸痛, 第九/十日起開始有啲nipple痛, 下面仲怨住怨住... 呢兩日又開始又水狀分泌 (但水狀分泌以前又試過喎)... 我不停同自己講, 呢啲全部都唔可以作準, 因為好多人bingo之前一啲先兆都冇... 而呢啲所謂的feel, 其實都係因為個人太留意自己身體狀況, 諗多左...愈諗得多, 只會對自己冇益...不過又不時check住, 自己仲有冇brest pain (脹是一直都很脹, 不踫佢又冇乜特別唔舒服, 但一掂就痛)...

我就來癲架嘞!!!!!!!!!!!!!!!!!!!!

婦女飲食影響嬰兒性別

荷蘭一項研究發現，婦女餐單會影響誕下的嬰兒性別。負責研究的大學用5年時間，跟進170多名生育過的歐洲婦女，她們全部誕下男嬰。 研究人員要求減少進食鈉及鉀質，例如少吃高鹽分的煙肉及沙樂美腸，或含豐富鉀質的香蕉，但要吸收多些鈣質及鎂，如乳酪、芝士、菠菜、豆腐、燕麥或全麥麥片、無花果及豆類。其中21名參與研究的婦女堅持到最後，當中16人最終誕下女嬰，成功率近八成。不過，準爸爸吃些甚麼，對嬰兒性別完全沒有影響。[AM 730]

哈, 如果係真又唔錯喎! 等我食多d豆腐同無花果先

我要積極一啲 - 針炙

上星期六, 剛好day 12 (即係around係我的ovulation), 去左睇中環的何醫師, 仲做埋針炙.

何醫師針炙用綿針, 一 d都唔痛, 又唔使針手指, 實在好! 但d 藥都好"熱", 每次飲的時候感覺係"咸到苦", 飲完亦會有5-10分鐘覺得喉嚨好痛! 但做人總要信, 所以都係要持之以恆一段時間.

雖然日子夾得好啱, 仲加埋針炙, 醫師叫我勤力d, 但撞正我出trip, day 14一朝早就要飛... 所以呢, 呢個cycle我都不予厚望.

咁都好, 冇期望就冇咁失望啦