IVF - day 17 放胎後第3日：豬一般的生活

放胎當日，除咗係食完藥之後唔舒服咗半個鐘，之後都一切正常。直到夜晚食完藥後，胃又頂住了，但未至於想嘔。我估係啲藥嘅反應吧？

放當第二日，一切正常，同樣早晚兩次覺得個胃唔舒服，每次都係半個鐘頭就OK。但下晝開始，發現個胸愈嚟愈痛，又唔係真係好痛，但係好annoying。當晚開始就做豬，下午小睡了一會，1200又上床，瞓到今朝10點！

瞓得好夠，但今朝一起身，連藥都未食就覺得就唔服，返教會途中仲開始標冷汗！好彩唔係好嚴重，喺教會坐低咗就慢慢好啲。但到晏晝食完飯，又開始攰了...於是又走去瞓！

Weekend就可以咁瞓法，聽日又返工了，唔知搞唔搞得掂

而家每日朝早起身要塞黃體gel, 夜晚又塞黃體藥。補充黃體藥又係早晚一次，加埋取卵手術後開始要食的抗生素，同埋葉酸，每日都好忙，好驚自已唔記得。

放完胎開始，雖然各位都提我要當正自已有咗，但事實真係feel唔到有咩分別 但呢兩日個人成日都唔係好舒服嘅狀態，就正正時刻都提醒我要小心啲，因為肚入便而家有BBs

除咗要記得食藥同塞藥，仲要每朝飲鮮奶、隔日食花膠同埋每晚用薑水泡腳。好彩媽媽之前幫我發定唔少花膠的存貨，但我都要隔日就煲一煲湯，用嚟“煨”啲花膠。我發現都係燉湯的口味同花膠夾啲 其實仲有啲朋友叫我食蛋白，但一來屋企冇烚蛋器，要烚到啲蛋啱啱好都唔係咁易... 要諗諗辦法先

今日食晏時同老公發白日夢，我問佢如果有得揀，而兩個都survive到，佢會想係咩combination呢？佢話最好一仔一女，但邊個大邊個細又冇所謂。我就話，最好係哥哥妹妹啦，我鍾意有哥哥可以照顧同保護妹妹 可能我都係人地細妹，我覺得做妹妹嘅幸福啲